اسرائیلی فورسز نے کمال عدوان اسپتال کو فوجی بیرک میں تبدیل کردیا ہے۔

اسپتال انتظامیہ کے مطابق اسرائیلی فورسز نے کمال عدوان اسپتال میں سینکڑوں افراد کو حراست میں لے لیا ہے۔

غزہ کی وزارت صحت کے ترجمان کا کہنا ہے کہ اسرائیلی فورسز نے 240 افراد کو حراست میں لیا ہے جن میں 80 طبی عملہ، 40 مریض اور 120 بے گھر افراد شامل ہیں۔

ترجمان کا مزید کہنا تھا کہ اسرائیلی فورسز نے اسپتال کے 6 عملے سمیت  ڈائریکٹر احمد محنا کو بھی حراست میں لیا ہے۔

دوسری جانب اسرائیل کی جانب سے شمالی غزہ میں جبالیہ پناہ گزین کیمپ پر بمباری کے نتیجے میں 10 فلسطینی شہید اور متعدد زخمی ہوگئے ہیں۔

اسرائیل کی رفح شہر میں بھی بمباری جاری ہے جس سے شہید فلسطینیوں کی تعداد 29 ہوگئی ہے جب کہ اسرائیلی فورسز نے رفح شہر میں رہائشی عمارتوں پر رات بھر حملے کیے ہیں۔

واضح رہے کہ غزہ میں 7 اکتوبر سے جاری اسرائیلی جارحیت کے نتیجے میں اب تک 18 ہزار سے زائد فلسطینی شہید ہوگئے ہیں جن میں بڑی تعداد بچوں اور خواتین کی شامل ہے۔