امریکی صدر جُوبائیڈن نے جاپان کے وسطی صوبے اشیکاوا میں آئے زلزلے کے بعد مدد کی پیش کش کردی۔

جاپان کے مشرقی علاقوں میں 7.4 شدت کا زلزلے کے بعد سونامی کی وارننگ جاری کردی گئی ہے جب کہ دارالحکومت ٹوکیو سے 400 کلومیٹر دور وسطی صوبے اشیکاوا میں 7.6 شدت کے زلزلے کے نتیجے میں درجنوں عمارتیں تباہ ہوگئیں۔

سڑکوں پر گہری دراڑیں پڑنے کے ساتھ رہائشی علاقے میں آگ بھڑک اٹھی اور ہزاروں گھر بجلی سے محروم ہوگئے۔

انتظامیہ کی جانب سے نیگاتا، تویاما اور اشیکاوا صوبوں کے ساحلی علاقوں میں سونامی کی وارننگ جاری ہونے کے بعد ہزاروں افراد کا انخلا کرالیا گیا ہے جب کہ ہلاکتوں کی تعداد 30 ہوگئی ہے اور 100 سے زائد افراد زخمی ہیں۔

ایسے حالات میں امریکی صدر جُوبائیڈن نے جاپان کے وسطی صوبے اشیکاوا میں آئے زلزلے کے بعد مدد کی پیش کش کردی ہے۔

صدر بائیڈن نے کہا کہ مشکل کی اس گھڑی میں جاپانی عوام کے ساتھ ہیں، زلزلے کے بعد جاپان کو مدد فراہم کرنے کے لیے تیار ہیں۔

واضح رہے کہ 11 مارچ 2011 کو بھی شمال مشرقی جاپان میں خوفناک زلزلہ کے بعد سونامی آیا تھا جس نے کئی شہروں کو تباہ کردیا تھا جب کہ زلزلے کے نتیجے میں فوکوشیما میں ایٹمی پگھلاؤ شروع ہوگیا تھا۔