حاضر سروس بھارتی فوجیوں کی بڑی تعداد کسانوں کے دہلی چلو مارچ میں جوق در جوق شامل ہونے لگی ہے۔

غیر ملکی خبر رساں ادارے کے مطابق حاضر سروس فوجی جوان کسانوں کے مارچ پر مودی سرکار کے ظلم وبربریت کے خلاف بھارتی میڈیا پر احتجاجی بیان دینا شروع ہوگئے ہیں۔

مارچ میں شامل فوجی جوان کے بیان کے مطابق بارڈرز پر تعینات پنجابی فوجی جوان دہلی چلو مارچ میں جلد شامل ہونے کا ارادہ رکھتے ہیں۔

بھارتی فوجی جوان کا کہنا تھا کہ کسان کا بیٹا ہوں، احتجاج چھ مہینے جاری رہے یا چھ سال میں استعفیٰ دے دوں گا، انڈین آرمی میرے لیے ضروری نہیں ہے۔

بھارتی فوجی نے کہا کہ چھٹی پر آئے ہوئے میرے ساتھی فوجی جوان اس مارچ میں بڑی تعداد میں شامل ہیں اور جب تک احتجاج جاری رہے گا، ہم اس مارچ کا حصہ رہیں گے، بارڈر کے بجائے بھارت کے اندر اپنے ہی شہری کسان مارے جا رہے ہیں۔

مارچ میں شامل بھارتی فوجی جوانوں کے مطابق دہلی چلو مارچ کو روکنے کے لیے جتنا مضبوط بارڈر مودی سرکار نے بنایا ہے اتنا مضبوط ہمسایہ ممالک کے ساتھ نہیں بنایا گیا۔