امریکہ نے  رفح پر اسرائیلی حملے کی حمایت کرنے سے انکار کردیا۔

ترجمان امریکی محکمہ خارجہ میتھیو ملر نے اپنی پریس بریفنگ میں کہاکہ امریکہ رفح میں اسرائیلی فوج کے زمین حملے کی حمایت نہیں کرے گا، جنگ بندی تجویز پر حماس کے ردعمل کا جائزہ لے رہا ہے۔

میتھیو ملر نے کہا کہ خطے میں اپنے شراکت داروں کے ساتھ بات چیت کر رہے ہیں، جنگ بندی معاہدہ اسرائیلیوں اور فلسطینیوں دونوں کے بہترین مفاد میں ہے، معاہدہ غزہ میں فوری جنگ بندی لائے گا اور غزہ میں انسانی امداد کی نقل و حرکت میں اضافہ ہو گا، اسرائیلیوں اور فلسطینیوں میں معاہدے تک پہنچنے کیلئےکام جاری رکھیں گے۔

ترجمان امریکی محکمہ خارجہ نے امریکہ میں سکھ رہنما کے قتل کی سازش میں بھارت کے ملوث ہونے کے سوال پر کہاکہ بھارت کو ان معاملات کو سنجیدگی سے لینا چاہیے، بھارتی تفتیش کے نتائج کا انتظار کررہے ہیں۔

دوسری جانب سیکرٹری جنرل اقوام متحدہ انتونیوگوتریس نے اسرائیل اور حماس سے خصوصی اپیل کرتے ہوئے کہا کہ جنگ بندی معاہدے اور موجودہ مصائب کو روکنے کے لیے مقرر حد سے آگے بڑھیں، رفح میں بڑے پیمانے پر آپریشن تشویشناک ہے، بین الاقوامی انسانی قانون میں عام شہریوں کا تحفظ سب سے اہم ہے۔