نئی دہلی: نریندر مودی آج تیسری مرتبہ وزارت عظمیٰ کے عہدے کا حلف اٹھائیں گے۔

بھارتی میڈیا کے مطابق تقریب حلف برداری آج شام مقامی وقت کے مطابق سوا 7 بجے نئی دہلی میں ہوگی، سری لنکا اور مالدیپ کے صدور، بنگلادیش، نیپال اور بھوٹان کے وزرائے اعظم شرکت کریں گے۔

غیرملکی اہم شخصیات کی ممکنہ موجودگی کے باعث نئی دہلی میں سیکیورٹی ہائی الرٹ کر دی گئی ہے جبکہ پولیس نے دارالحکومت نئی دہلی کو اگلے 2 دن کے لیے نو فلائی زون بھی قرار دے دیا۔

بھارتی میڈیا کے مطابق نئی دہلی میں داخل ہونے والے کچھ راستوں کو بند کر دیا جائے گا۔

واضح رہے کہ بھارتیہ جنتا پارٹی کے اتحاد، نیشنل ڈیموکریٹک الائنس کے قانون سازوں کی جانب سے نریندر مودی کو باضابطہ طور پر تیسری بار وزیراعظم نامزد کر دیا گیا تھا جس کے بعد بھارتی صدر دروپدی مرمو نے مودی کو آج حکومت سازی کی دعوت دی تھی۔