عالمی رہنماؤں کی جانب سے امریکا کے سابق صدر ڈونلڈ ٹرمپ پر قاتلانہ حملے کی شدید مذمت کی گئی ہے۔

امریکی صدر جوبائیڈن نے سابق امریکی صدر ڈونلڈ ٹرمپ پر قاتلانہ حملے کی مذمت کرتے ہوئے کہا کہ ٹرمپ حملے میں محفوظ رہے یہ جان کر خوشی ہوئی۔

جوبائیڈن نے مزید کہا کہ امریکہ میں ایسے واقعات کی کوئی گنجائش نہیں، ایسے واقعے کی مذمت کیلئے بطور ایک قوم متحد ہونا چاہیے۔

دوسری جانب برطانوی وزیر اعظم کئیر اسٹارمر نے اپنے بیان میں کہا کہ ٹرمپ پر فائرنگ کے دل دہلا دینے والے مناظر پر حیرت زدہ ہوں، معاشرے میں کسی بھی شکل میں سیاسی تشدد کی کوئی جگہ نہیں۔

بھارتی وزیر اعظم نریندر مودی نے بھی سابق امریکی صدر پر قاتلانہ حملے کی مذمت کرتے ہوئے کہا کہ اپنے دوست، سابق صدر ڈونلڈ ٹرمپ پر حملے پر گہری تشویش ہے، سیاست اور جمہوریت میں تشدد کی کوئی جگہ نہیں ہے۔

نریندر مودی نے مزید کہا کہ ہمارے خیالات اور دعائیں مرنے والوں کے اہل خانہ، زخمیوں اور امریکی عوام کے ساتھ ہیں۔

علاوہ ازیں کینیڈا کے وزیراعظم جسٹن ٹروڈو نے بھی ڈونلڈ ٹرمپ پر قاتلانہ حملے کی مذمت کرتے ہوئے کہا کہ سابق امریکی صدر ٹرمپ پر فائرنگ پریشان کُن ہے۔

جاپانی وزیراعظم فومیو کیشیدا نے بھی ڈونلڈ ٹرمپ سے یکجہتی کا اظہار کرتے ہوئے واضح کیا کہ سیاسی تشدد کے خلاف سب کو اکٹھا کھڑا ہونا چاپیے۔

اسرائیلی وزیراعظم نیتن یاہو نے بھی سابق امریکی صدر پر قاتلانہ حملے کی مذمت کرتے ہوئے کہا کہ سابق صدر ٹرمپ پر حملے سے میں حیران رہ گیا، ان کی جلد صحت یابی کیلئے دعا گو ہوں۔

بعدازاں وزیراعظم پاکستان شہباز شریف نے سابق امریکی صدر ڈونلڈ ٹرمپ پر انتخابی ریلی کے دوران حملے پر رد عمل دیتے ہوئے کہا کہ سیاسی عمل میں ہر قسم کا تشدد قابل مذمت ہے۔

انہوں نے ڈونلڈ ٹرمپ اور حملے میں زخمی ہونے والے دیگر افراد کی جلد صحت یابی کے لیے بھی دعا کی اور کہا کہ اس مشکل وقت میں ہماری ہمدردیاں نیک خواہشات ڈونلڈ ٹرمپ کے خاندان کے ساتھ ہیں۔

واضح رہے کہ امریکی ریاست پنسلوانیا میں سابق امریکی صدر اور ری پبلکن پارٹی کے صدارتی امیدوار ڈونلڈ ٹرمپ پر انتخابی ریلی کے دوران قاتلانہ حملہ کیا گیا جس کے نتیجے میں وہ زخمی ہو گئے۔

امریکی میڈیا کے مطابق فائرنگ کے بعد سیکیورٹی اہلکاروں نے سابق صدر ڈونلڈ ٹرمپ کو حصار میں لے لیا اور وہاں سے لے کر روانہ ہو گئے جبکہ گولیاں چلنے سے ریلی میں موجود ایک شخص ہلاک بھی ہوا۔

ٹرمپ کی منعقد ریلی میں فائرنگ کی آوازوں سے پنسلوینیا کے علاقے بٹلر میں  بھگدڑ مچ گئی جبکہ سابق صدر ٹرمپ کو محفوظ مقام پر منتقل کردیا گیا اور انکو قریبی مرکز میں طبی امداد دی جارہی ہے۔