سعودی عرب کے وزیر خارجہ شہزادہ فیصل بن فرحان نے کہا ہے کہ خطے میں بڑھتے ہوئے تنازعات اور جاری خلاف ورزیوں پر عالمی برادری کو سخت موقف اختیار کرنے کی ضرورت ہے۔

سعودی وزیر خارجہ شہزادہ فیصل بن فرحان نے اقوام متحدہ کی جنرل اسمبلی سے خطاب کرتے ہوئے کہا کہ سعودی عرب، اقوام متحدہ کے چارٹر کو ٹھوس حقیقت میں بدلنے کی ہر ممکنہ کوششوں کا خواہش مند ہے۔

غزہ پٹی میں انسانی المیے کی جانب اشارہ کرتے ہوئے شہزادہ فیصل بن فرحان نے اسرائیلی جارحیت کی روک تھام کے لیے بین الاقوامی کمیٹی کی جانب سے ٹھوس اقدامات کرنے اور فلسطینی عوام کو ان کا جائز حق دلوانے کی اہمیت پر زور دیا اور کہا کہ سعودی عرب ہمیشہ سے فلسطینیوں پر جاری اسرائیلی جرائم کی مذمت کرتا ہے۔

انہوں نے مملکت کی جانب سے فلسطینی عوام کو فراہم کی جانے والی 5 ارب ڈالر کی امداد کا ذکر کیا اور کہا کہ مملکت اقوام متحدہ کی ایجنسی کی سپورٹ جاری رکھے گی تاکہ وہ فلسطینیوں کی مدد کے لیے کام کرسکے۔

سعودی وزیر خارجہ نے اسرائیل کی جانب سے بڑھتی ہوئی جارحیت کو سلامتی اور قیام امن کے خلاف اقدام قرار دیتے ہوئے کہا کہ جاری خلاف ورزیوں پر کسی قسم کی روک تھام یا سزا نہ دینے سے مزید ترغیب ملتی ہے جس سے کسی بھی صورت قیام امن کے اہداف حاصل نہیں کیے جاسکتے۔

اس موقع پر شہزادہ فیصل بن فرحان نے مسئلہ فلسطین کے مستقل اور طویل المدتی حل کے لیے پرامن کوششوں کے حوالے سے عالمی اداروں کے کردار کو فعال کرنے کی اہمیت پر بھی زور دیا۔