بھارت کا جنگی جنون سر چڑھ کر بولنے لگا،  مودی سرکار  نے 1300 ارب روپے کا جدید اسلحہ خریدنے کی منصوبہ بندی کرلی۔

بھارتی میڈیا کی رپورٹ کے مطابق بھارت کی ڈیفنس ایکوزیشن کونسل آج 7 فریگیٹس، 26 رافیل طیاروں اور 1700  ٹینکس خریداری کی منظوری دے گی۔

پروجیکٹ 17 براوو  کے تحت 700 ارب روپے کی لاگت سے 7 اسٹیلتھ فریگیٹس کی تیاری کا منصوبہ ہے۔

بھارتی بحریہ 8 ہزار ٹن ڈسپلیسمنٹ والے 7  فریگیٹس کے بعد 10 سے 12 ہزار ٹن  کے ڈسٹرائر کی تیاری میں بھی دلچسپی رکھتی ہے۔

بھارتی فوج کا روسی ساختہ ٹی 72 ٹینکس کی جگہ 1700 نئے ٹینکس کی تیاری کا بھی منصوبہ ہے۔ بھارتی بری فوج 500 ارب روپے کی لاگت سے 1700 ٹینکس تیار کرنے کا ارادہ رکھتی ہے۔

بھارتی بحریہ نئے طیارہ بردار آئی این ایس وکرم ادتیہ کے لئے 26 رافیل طیارے خریدے گی۔ طیارہ بردار جہاز آئی این  ایس وکرانت پر متعین روسی ساختہ مگ 29 طیارے بوسیدہ ہونے کے ساتھ تعداد میں بھِی کم ہیں۔

بھارتی بحریہ 2027 تک 200 سے زیادہ وار شپس کاہدف حاصل کرنا چاہتی ہے۔