حزب اللہ نے اسرائیل کے علاقے قیصریہ میں وزیر اعظم نیتن یاہو کے گھر پر حالیہ ڈرون حملے کی ذمہ داری قبول کرلی ہے۔

غیر ملکی خبر رساں ادارے کی رپورٹ کے مطابق حزب اللہ کے میڈیا آفس کے سربراہ محمد عفیف کا کہنا ہے ’’سیزریا آپریشن اور نیتن یاہو کے گھر کو نشانہ بنانے کی ذمہ داری قبول کرتا ہے‘‘۔

انہوں نے مزید کہا ’’اسرائیل کے ساتھ جنگ جاری رہنے تک کوئی مذاکرات نہیں ہوں گے‘‘۔

دوسری جانب اسرائیلی وزیر اعظم نیتن یاہو کے ترجمان کا کہنا ہے کہ لبنان کی جانب سے لانچ کیے گئے تین ڈرونز میں سے ایک نے قیصریہ میں وزیر اعظم کے گھر کو نشانہ بنایا تاہم وہ حملے میں محفوط رہے اور کسی جانی نقصان کی اطلاع بھی موصول نہیں ہوئی۔

واضح رہے کہ  لبنان کی مزاحمتی تحریک حزب اللہ کی جانب سے اسرائیل کے شہر قیصریہ میں فائر کیے گئے راکٹ میں اسرائیلی وزیراعظم نیتن یاہو کی ذاتی رہائش گاہ کو نشانہ بنایا گیا تھا۔