شمالی اسرائیل پر حزب اللہ  کے ڈرون حملے میں  4 فوجی ہلاک اور 60 سے زائد زخمی ہوگئے۔

بین الاقوامی خبررساں ادار ے کے مطابق  شمالی اسرائیل پر حزب اللہ کے ڈرون حملے میں 4 اسرائیلی فوجی ہلاک جبکہ 60 سے زائد فوجی زخمی ہوگئے  جن میں سے 7 کی حالت تشویشناک ہے۔

اسرائیلی میڈیا کے مطابق شمالی اسرائیل میں بنیامین کے علاقے میں دھماکا سنائی دیا جس کے بعد متاثرہ مقام پر ایمبولینسز روانہ کردی گئیں۔

اسرائیلی میڈیا کی جانب سے دعویٰ کیا گیا ہے کہ یہ 7 اکتوبر 2023 کے بعد ہلاک و زخمی ہونے والے فوجیوں کی تعداد  کے حوالے سے اسرائیلی فوج پر ہونے والا سب سے بڑا حملہ ہے۔

عرب میڈیا کے مطابق لبنان سے آنے والے ڈرون نے اسرائیلی فوج کی گولانی بریگیڈ کی ٹریننگ بیس کو نشانہ بنایا۔حملے کے وقت بیس پر موجود فوجی کھانے کے لیے میس میں جمع تھے جہاں  ڈرون آکر گرا۔

اسرائیلی میڈیا اور سوشل میڈیا پر گردش کرنے والی ویڈیوز میں دیکھا جاسکتا ہے کہ حملے کے مقام پر بڑی تعداد میں ایمبولنسز موجود ہیں جبکہ زخمیوں کو منتقل کرنے کے لیے ہیلی کاپٹروں کی بھی متواتر پروازیں جاری ہیں۔

اسرائیلی میڈیا کے مطابق حملے کے بعد اطراف کے اسپتالوں میں ایمرجنسی نافذ کردی گئی ہے ۔

 حزب اللہ  کی جانب سے اسرئیلی فوج پر حملے کی تفصیلات جاری کردی گئیں۔

حزب اللہ کے ترجمان کا کہنا ہے کہ میزائل فورس نے مختلف اہداف کی طرف درجنوں میزائل داغے۔میزائل داغنے کا مقصد اسرائیلی فضائی دفاعی نظام کو مصروف کرنا تھا۔

حزب اللہ ترجمان کا مزید کہنا ہے کہ سیکڑوں میزائلوں  سے اسرائیلی دفاعی نظام کو مصروف کرکے مختلف ڈرونز سے ایکڑ اور حیفہ  کے مختلف علاقوں کونشانہ بنایا گیا۔

ترجمان کا کہنا ہے کہ اس حکمت عملی کے ذریعے ڈرونز اسرائیلی ریڈاروں کی نظرمیں آئےبغیربنیامین  میں اپنےہدف تک پہنچ گئے۔