یونیسیف نے لبنان میں جنگ بندی کا مطالبہ کرتے ہوئے ملک میں جسمانی چوٹوں سمیت نفسیاتی بیماریاں بڑھنے کا انکشاف کردیا۔

اقوام متحدہ کی بچوں کی ایجنسی یونیسیف کا کہنا ہے ’’یہ تباہ کن تنازعہ لبنان میں بچوں کو بہت زیادہ نقصان پہنچا رہا ہے‘‘۔

یونیسیف کی علاقائی ڈائریکٹر ایڈیل کھودر نے ایک بیان میں کہا ’’ڈاکٹروں نے ہمیں بتایا ہے کہ گذشتہ دنوں زخمی بچوں میں اضافہ ہوا ہے جو جسمانی چوٹوں سمیت نفسیاتی بیماریوں میں مبتلا تھے‘‘۔

ایڈیل کھودر کہتی ہیں ’’بہت سے بچے دھماکوں کی وجہ سے اینزائٹی کا شکار ہیں اور انہیں ڈراؤنے خواب بھی آتے ہیں جس کی وجہ وہ کافی پریشانی میں مبتلا ہیں‘‘۔

ان کا کہنا تھا ’’کسی بھی بچے کو ایسے خوفناک حالات کا سامنا نہیں کرنا چاہیے‘‘۔

یونیسیف نے بتایا کہ زیادہ تر بچوں کو دھماکوں کی وجہ سے سماعت کا نقصان اٹھانا پڑ رہا ہے جب کہ ان کی جسم پر بھی خطرناک زخم دیکھنے کو ملے ہیں۔

دوسری جانب عالمی ادارہ صحت (ڈبلیو ایچ او) کی جانب سے اسرائیلی حملوں کے ہزاروں متاثرین کے علاج کے لیے طبی سامان کی پہلی کھیپ بیروت پہنچ گئی ہے۔

ڈبلیو ایچ او کے سربراہ ٹیڈروس اذانوم گیبریئس کے مطابق آج مزید دو پروازوں کا منصوبہ ہے جب کہ ایک پرواز کل کے لیے شیڈول ہے۔