تہران: ایران نے اسرائیل کو دھمکی دیتے ہوئے کہا کہ ہم اسرائیل میں کسی بھی مقام کو نشانہ بنانے کی صلاحیت رکھتے ہیں۔

غیر ملکی خبر رساں ادارے کی رپورٹ کے مطابق ایرانی فوج کے جنرل مرتضیٰ میران نے اسرائیل کو دھمکی دیتے ہوئے کہا کہ اگر دشمن نے چھوٹی سی بھی غلطی کی تو ہم اسے خاک میں ملادیں گے۔

ایرانی جنرل کا کہنا تھا کہ ہم نے جس جگہ کو چاہا نشانہ بنایا اور ہم جس جگہ چاہیں نشانہ بناسکتے ہیں جب کہ ہم اسرائیل میں کسی بھی مقام کو نشانہ بنانے کی صلاحیت رکھتے ہیں۔

انہوں نے کہا کہ ہماری انگلیاں ہر وقت ٹریگر پر ہیں تاکہ اگر دشمن کوئی بھی چھوٹی سی غلطی کرے تو ہم اسے خاک میں ملادیں، آپریشن ٹرو پرومس 2 میں ہم نے دشمن پر حملہ کرکے اپنی طاقت کا مظاہرہ کیا ہے۔

خیال رہے کہ یکم اکتوبر کو ایران نے اسرائیل پر 180 سے زائد میزائل داغے تھے تاہم یہ حملہ اسرائیلی دفاع نے ناکام بنادیا تھا اور کسی جانی نقصان کی اطلاع موصول نہیں ہوئی تھی۔

مرتضیٰ میران نے اسرائیلی دفاعی نظام کا حوالہ دیتے ہوئے کہا کہ ہم نے اسرائیل کی مدد کرنے والے ممالک کو بھی دکھادیا ہے کہ ہم جب چاہیں اور جہاں چاہیں اس جگہ کو نشانہ بناسکتے ہیں۔

انہوں نے مزید کہا کہ ہم کارروائی کرتے ہوئے جواب دیں گے اور حملہ چاہے کتنا ہی بڑا ہو، اس کا اتنی ہی شدت سے جواب دیا جائے گا۔