بیروت: حزب اللہ کے نئے سربراہ نعیم قاسم نے اسرائیل کو واضح پیغام دیتے ہوئے کہا کہ وہ ہمیں شکست نہیں دے سکتے۔

غیر ملکی خبر رساں ادارے کی رپورٹ کے مطابق حزب اللہ کے نئے سربراہ نعیم قاسم نے خطاب کرتے ہوئے کہا کہ حزب اللہ کو سیز فائر کے لئے مجوزہ مسودہ موصول ہوگیا۔

نعیم قاسم کے مطابق سیز فائر کا مسودہ امریکی ایلچی نے فراہم کیا، جنگ بندی اسرائیلی ردعمل اور نیتن یاہو کی سنجیدگی پر منحصر ہے۔

سربراہ حزب اللہ کا کہنا ہے کہ اسرائیل ہمیں شکست نہیں دے سکتا، اسرائیل لبنان کی خود مختاری کا خیال رکھے، لبنان کی خود مختاری کے تحفظ تک مذاکرات جاری رہیں گے۔

ان کا کہنا تھا کہ اگر مذاکرات ناکام ہوئے تو جنگ جاری رکھیں گے، ہم قابل ہیں اور لڑتے رہیں گے۔

سربراہ حزب اللہ مزید کہتے ہیں کہ غزہ اور لبنان میں جنگ کا واحد حل نسل کشی کی کارروائیوں کا خاتمہ ہے، اسرائیل لبنان میں گھس کر شہریوں کو شہید کرنا بند کرے۔