کینیڈا نے بھارتی وزیر خارجہ جے شنکر کی پریس کانفرنس نشر کرنے پر آسٹریلوی میڈیا کو بلاک کردیا ہے۔

غیر ملکی میڈیا کی رپورٹ کے مطابق آسٹریلیا کے وزیر خارجہ پینی وونگ کے ساتھ بھارتی وزیر خارجہ ایس جے شنکر نے مشترکہ پریس کانفرنس کی تھی۔

اس پریس کانفرنس کو نشر کرنے پر کینیڈا نے آسٹریلیا ٹو ڈے کے سوشل میڈیا اکاؤنٹس کو بلاک کردیا ہے جب کہ یہ اقدام پریس کانفرنس کے دوران کینیڈا کے خلاف جے شنکر کے تنقیدی تبصرے کے بعد سامنے آیا۔

بھارتی وزارت خارجہ کے ترجمان رندھیر جیسوال کا کہنا ہے کہ سوشل میڈیا ہینڈلز اور آسٹریلیا ٹوڈے کے کچھ پیجز کو بلاک کرنے کی کینیڈا کی کارروائی آزادی اظہار کے حوالے سے منافقت کا منہ بولتا ثبوت ہے۔

ترجمان نے اپنی ہفتہ وار بریفنگ میں ایک سوال کا جواب دیتے ہوئے کہا کہ ہم سمجھتے ہیں کہ سوشل میڈیا اکاؤنٹ اور ادارے کے مخصوص صفحات کو بلاک کیا گیا ہے جو کینیڈا میں ناظرین کے لیے دستیاب نہیں ہیں۔

انہوں نے مزید بتایا کہ وزیر خارجہ جے شنکر اور پینی وونگ کی پریس کانفرنس نشر کرنے کے صرف چند گھنٹوں بعد ہی اس مخصوص اکاؤنٹ کو بلاک کردیا گیا تھا۔