امریکی شہر نیو اورلینز میں ہجوم پر گاڑی چڑھانے کے واقعے کی سی سی ٹی وی ویڈیو سامنے آگئی ہے۔

غیر ملکی خبر رساں ادارے کی رپورٹ کے مطابق امریکہ کے شہر نیو اورلینز میں گذشتہ روز کارسوار نے گاڑی ہجوم پر چڑھادی تھی جس کے نتیجے میں کم از کم  10 افراد ہلاک ہوگئے تھے۔

تاہم حکام کے مطابق واقعے میں ہلاک ہونے والوں کی تعداد 15 ہوگئی ہے جب کہ 35 افراد زخمی ہیں۔

ہجوم پر گاڑی چڑھانے میں ملوث ملزم پولیس مقابلے میں مارا گیا ہے جس کی شناخت شمس الدین جبار کے نام سے ہوئی ہے۔

امریکی تحقیقاتی ادارے ایف بی آئی کے مطابق ملزم امریکہ میں پیدا ہوا تھا اور فوج میں ملازم رہ چکا تھا جب کہ گاڑی سے داعش کا جھنڈا بھی برآمد ہوا۔

ایف بی آئی نے واقعے کو دہشت گردی قرار دیتے ہوئے بتایا کہ ملزم ٹیکساس میں پلا بڑھا تھا اور شمالی کیرولائنا میں بھی مقیم رہا۔