بھارتی ہیلی کاپٹرز حادثات کے بعد فضائی عملے کی صلاحیتوں پر سنگین سوالات اٹھ گئے۔

بھارتی پولیس کے مطابق 5 جنوری 2025ء کو بھارتی ریاست گجرات میں کوسٹ گارڈ ہیلی کاپٹر تباہ ہوا جس میں تین افراد ہلاک ہوئے، ہیلی کاپٹر معمول کی پرواز کے دوران گر کر تباہ ہوا، عملے کے 3 افراد کو شدید زخمی حالت میں ریسکیو کیا گیا۔

مودی کے دور اقتدار میں دیگر شعبوں میں نااہلی کے ساتھ شعبہ ہوا بازی میں بھی آئے روز حادثات ہو رہے ہیں، کبھی بھارت کے جنگی طیارے تباہ ہوتے ہیں، کبھی بحریہ کے جہازوں کو حادثات پیش آتے ہیں اور کبھی ہیلی کاپٹر موت بن جاتے ہیں، اس کی بڑی وجہ کرپشن اور اہم شعبوں میں رشوت کے عوض نااہل افراد کی بھرتیاں ہیں، بھارت میں ہیلی کاپٹر حادثات کی ایک لمبی فہرست ہے۔

گزشتہ دو سالوں کے دوران بھارت میں کئی ہیلی کاپٹر حادثات ہوچکے ہیں جن میں فوجی اور نیم فوجی ہیلی کاپٹر شامل ہیں، 16 مارچ 2023ء کو آرمی چیتا ہیلی کاپٹر ریاست ارونا چل پردیش میں گر کر تباہ ہوا جس میں دونوں پائلٹ ہلاک ہوئے۔

 اپریل 2023 میں ہندوستانی بحریہ کو اے ایل ایچ دھرو ہیلی کاپٹر کو ممبئی میں تکنیکی خرابی کے  باعث ہنگامی لینڈنگ کرنا پڑی جبکہ مئی 2023 میں ہندوستانی کوسٹ گارڈ کا اے ایل ایچ دھرو ہیلی کاپٹر بحیرہ عرب میں دوران آپریشن تباہ ہوا اس حادثے نے آپریشنل حفاظتی انتظامات پر سوال اٹھا دیے۔

 اکتوبر 2023 میں ہندوستانی فضائیہ کے اے ایل ایچ دھرو ہیلی کاپٹرکو ریاست بہار میں امدادی مشن کے دران ہنگامی لینڈنگ کرنا پڑی اور اس اس حادثے نے بھی  آپریشنل صلاحیتوں پر سوال اٹھادیے۔

4 نومبر 2023 کو کوچی میں چیتک ہیلی کاپٹر گر کر تباہ ہوا جس میں ایک ہلاکت ہوئی، مارچ 2024 میں پوربندر میں کوسٹ گارڈ اے ایل ایچ دھرو ہیلی کاپٹر گجرات میں لینڈنگ کے دوران تباہ ہوا جس میں عملے کے تین افراد ہلاک ہوئے۔

2 ستمبر 2024 کو بحیرہ عرب میں ایک اور کوسٹ گارڈ اے ایل ایچ دھرو ہیلی کاپٹر ریسکیو آپریشن کے دوران تباہ ہوا، ایک سال میں دوسرے حادثے نے طیاروں کی حفاظت پر سنگین سوالات اٹھائے۔

بھارتی فضائی ماہرین کا کہنا ہے کہ بھارت میں آئے روز ہیلی کاپٹرز کے حادثات نے عملے کی صلاحیتوں پر سوالات اٹھادیے، ہیلی کاپٹرز کے آئے روز حادثات کے باعث ان کا کسی بھی ریسکیو آپریشن میں استعمال بھی اب خطرناک بن چکا ہے، اس طرح کے ہیلی کاپٹر حادثات دراصل مودی سرکار کی کرپشن اور میرٹ سے ہٹ کر تعیناتیوں کا نتیجہ ہیں۔