یواین ویمن کی ایگزیکٹو ڈائریکٹر سیما بہاؤس نے طالبان سے لڑکیوں کو تعلیم دینے کا مطالبہ کر دیا۔

طالبان کے زیرِ اقتدار افغانستان میں انسانی بالخصوص خواتین کے حقوق کی خلاف ورزیاں عروج پر ہیں، لڑکیوں کے لیے ثانوی اور اعلیٰ تعلیمی ادارے 3 سال سے مستقل بند ہیں، جس سے لاکھوں افغان لڑکیاں تعلیم سے محروم ہو چکی ہیں۔

یو این ویمن کی ایگزیکٹو ڈائریکٹر سیما بہاؤس نے اس حوالے سے ایک سخت انتباہ جاری کیا اور کہا کہ افغانستان میں لڑکیوں کو تعلیم سے محروم رکھنا نسلوں تک اثرات مرتب کرے گا، لڑکیوں کو فوری طور پر اسکول واپس جانے کی اجازت دی جائے۔

انہوں نے کہا کہ نئے تعلیمی سال کے آغاز کے ساتھ مزید 400,000 لڑکیاں تعلیم سے محروم ہو گئی ہیں، طالبان افغان خواتین کے بنیادی حقوق کو فوری طور پر بحال کریں۔

سیما بہاؤس نے مزید کہا کہ افغانستان میں تعلیم سے محروم لڑکیوں کی مجموعی تعداد 2.2 ملین تک پہنچ گئی ہے، اگر موجودہ پابندیاں برقرار رہیں تو 2030 تک افغانستان کی 4 ملین سے زیادہ لڑکیاں اسکول سے باہر ہو سکتی ہیں، وقت آچکا ہے کہ افغان حکومت اس سنگین مسئلے کا فوری حل نکالے۔