رمضان المبارک کے آغاز کے ساتھ ہی مسجد الحرام میں زائرین کی آمد میں غیر معمولی اضافہ دیکھنے کو ملا ہے اور ابتدائی 10 دنوں میں ڈھائی کروڑ سے زائد افراد نے یہاں حاضری دی۔

سعودی عرب کی حرمین شریفین اتھارٹی کے جاری کردہ اعداد و شمار کے مطابق رمضان کے پہلے عشرے میں تقریباً 55 لاکھ افراد نے عمرہ کی سعادت حاصل کی۔

حرمین جنرل اتھارٹی کا کہنا ہے کہ زائرین کی رہنمائی اور مدد کے لیے 11 ہزار سے زائد ملازمین مسجد الحرام کی مختلف گزرگاہوں اور صحنوں میں تعینات کیے گئے ہیں جن کی نگرانی کے لیے 350 سپروائزر بھی موجود ہیں۔

علاوہ ازیں لاکھوں زائرین کو آب زمزم کی فراہمی کے لیے 20 ہزار ڈسپینسرز نصب کیے گئے ہیں تاکہ ہر فرد کو سہولت مل سکے۔

مسجد الحرام میں دنیا کے بڑے کولنگ سسٹمز میں سے ایک موجود ہے جو ایک لاکھ 55 ہزار ٹن کی گنجائش رکھتا ہے اور گرمی کے دوران زائرین کے لیے راحت کا سامان فراہم کرتا ہے۔

اس کے علاوہ رمضان کے پہلے عشرے میں مسجد نبوی ﷺ میں بھی نمازیوں کی تعداد ایک کروڑ تک پہنچ گئی ہے جو اس بات کا غماز ہے کہ دنیا بھر سے مسلمان اس مقدس مہینے میں عبادت کے لیے حرمین شریفین کا رخ کر رہے ہیں۔