اسرائیلی حکومت نے سپریم کورٹ کی مخالفت کے بعد اپنی سیکیورٹی ایجنسی شین بیت کے چیف رونن بار کی برطرفی کا فیصلہ واپس لے لیا ہے، تاہم اسرائیلی حکومت 7 اکتوبر کو حماس کے حملوں کو روکنے میں ناکامی پر سیکیورٹی چیف کو برطرف کرنا چاہتی تھی۔

غیر ملکی خبر رساں ایجنسی کے مطابق اسرائیلی وزیراعظم نیتن یاہو نے سیکیورٹی چیف کو مارچ میں ان کے عہدے سے برطرف کردیا تھا، تاہم اسرائیلی سپوریم کورٹ نے رونن کو بار کو برطرف کرنے سے روک دیا تھا۔

رونن بار کو برطرف کرنے اور غزہ میں جنگ دوبارہ شروع کرنے کے خلاف ہزاروں افراد نے سڑکوں پر نکل کر احتجاج کیا، جس کے بعد نیتن یاہو کو اپنا یہ فیصلہ واپس لینا پڑا ہے۔

اسرائیلی حکومت نے سیکیورٹی چیف کی برطرفی کا فیصلہ واپس لیتے ہوئے عدالت کو بھی اپنے فیصلے سے آگاہ کردیا ہے، تاہم رونن بار نے گزشتہ دنوں ایک بیان میں کہا تھا کہ وہ 15 جون کو اپنے عہدے سے مستعفی ہوجائیں گے۔