استنبول: بدھ کے روز ترکی کے سب سے بڑے شہر استنبول اور اس کے مضافاتی علاقوں میں 6.2 شدت کا زلزلہ محسوس کیا گیا جس سے عمارتیں لرز اٹھیں اور عوام میں خوف و ہراس پھیل گیا۔

امریکی جیولوجیکل سروے کے مطابق زلزلے کی شدت 6.2 ریکارڈ کی گئی جبکہ اس کی گہرائی صرف 10 کلومیٹر تھی۔ زلزلے کا مرکز استنبول سے تقریباً 40 کلومیٹر جنوب مغرب میں بحیرہ مرمرہ میں واقع تھا۔

ابتدائی اطلاعات کے مطابق زلزلے سے کسی جانی یا مالی نقصان کی کوئی اطلاع نہیں ملی ہے۔ تاہم سوشل میڈیا پر شہریوں کی جانب سے شیئر کی گئی ویڈیوز میں دیکھا جاسکتا ہے کہ لوگ خوفزدہ ہو کر عمارتوں سے باہر بھاگتے نظر آئے۔

خیال رہے کہ ترکیہ دو بڑی فالٹ لائنز پر واقع ہے جس کے باعث یہاں زلزلے اکثر آتے رہتے ہیں۔ گزشتہ برس 6 فروری 2023 کو ترکی کے جنوبی اور جنوب مشرقی علاقوں میں 7.8 شدت کا تباہ کن زلزلہ آیا تھا جس کے چند گھنٹوں بعد ایک اور شدید جھٹکا محسوس کیا گیا تھا۔

ان زلزلوں کے نتیجے میں 11 صوبے بری طرح متاثر ہوئے تھے، لاکھوں عمارتیں منہدم یا تباہ ہوگئی تھیں اور 53 ہزار سے زائد افراد جاں بحق ہوئے تھے۔