اسرائیلی وزیراعظم نیتن یاہو نے کہا ہے کہ ثابت قدم رہیں گے، حماس کے سامنے ہتھیار نہیں ڈالیں گے۔

نیتن یاہو نے اپنے جاری کردہ بیان میں کہا کہ حماس کو ختم نہ کیا تو دوبارہ 7 اکتوبر ہوسکتا ہے، ہم جنگ کے نازک مرحلے پر ہیں، ثابت قدم رہیں گے، حماس کے سامنے ہتھیار نہیں ڈالیں گے۔

اسرائیلی وزیراعظم نے مزید کہا کہ ایران کو جوہری ہتھیاروں کے حصول سے روکنے کیلئے پُرعزم ہیں، اسرائیلی باشندوں کی حفاظت کیلئے شام اور لبنان میں سیکیورٹی زون قائم کیے۔

واضح رہے کہ غزہ جنگ کے خاتمے کے لیے عوامی دباؤ میں مزید اضافہ ہو رہا ہے، عرب میڈیا کے مطابق اب تک 1 لاکھ 38 ہزار اسرائیلی شہری غزہ جنگ بندی کی پیٹیشن پر دستخط کر چکے ہیں، جن میں 1 لاکھ 27 ہزار 255 عام شہری اور 11 ہزار 179 فوجی اہلکار شامل ہیں۔

سرکاری میڈیا کے مطابق غزہ پٹی میں 7 اکتوبر 2023 سے جاری اسرائیلی وحشیانہ حملوں میں مجموعی طور پر 12 ہزار مرتبہ اجتماعی قتل عام کیا گیا جس کے نتیجے میں 51 ہزار 65 فلسطینی شہید ہوئے جن میں 18 ہزار سے زائد فلسطینی بچے 12 ہزار 400 سے زائد خواتین شامل ہے۔

اس کے علاوہ ڈاکٹروں سمیت طبی عملے کے 1 ہزار 402 ارکان، 113 شہری دفاع کے کارکنان، 211 صحافی اور 748 سیکیورٹی اہلکار اور 13ہزار طلبا اسرائیلی فورسز کے ہاتھوں شہید کیے جاچکے ہیں۔