پاکستان  کیخلاف گودی میڈیا کی جھوٹی میڈیا کیمپین پر بین الاقوامی ہزیمت کا سلسلہ جاری ہے اور نیویارک ٹائمز سمیت دنیا بھر کے بڑے اخبارات بھی اس جھوٹ کے خلاف بول اٹھے ہیں۔

نیویارک ٹائمز کے مطابق پاک بھارت جنگ کے دوران بھارتی میڈیا نے جھوٹا پروپیگنڈہ پھیلایا، اور جھوٹی خبروں کے ذریعے بھارتی فوج کی زبر دست کامیابیوں کا تذکرہ کیا۔

بھارتی میڈیا کے مطابق بھارت نے حملوں میں پاکستانی ایٹمی تنصیبات کو نہ صرف نشانہ بنایا بلکہ بھارتی فوج نے 2 پاکستانی لڑاکا طیارے بھی مار گرائے اور ساتھ ہی کراچی کی بندرگاہ کے ایک حصے کو دھماکے سے اڑا دیا۔

نیو یارک ٹائمز کا کہنا ہے کہ بھارتی میڈیا کی معلومات کا کوئی بھی حصہ درست نہیں تھا، پاکستان کیخلاف گمراہ کن ویڈیو فوٹیج اور مصنوعی ذہانت سے ہیرا پھیری کر کے جھوٹ پھیلایا،  گیا، اس میں بھارتی میڈیا کےمین اسٹریم چینلز بھی شامل ہیں۔

یہ بھی پڑھیں: گودی میڈیا کا بھانڈا پھوٹ گیا، بھارتی صحافی نے سب سچ اُگل دیا

نیو یارک ٹائمز کے مطابق بھارتی میڈیا کو خبروں کو بریک کرنے کی دوڑ کا بخار چڑھ گیا، اور غیر سنجیدہ رویہ اپناتے ہوئے بھارتی اینکرز اور مبصرین نے دوجوہری ریاستوں کے درمیان جنگ کے لیے چیئر لیڈرز کا کردار کیا،  کچھ مشہور بھارتی ٹی وی چینلز نےقوم پرستی کےجوش کی آڑ میں من گھڑت کہانیاں نشر کیں۔

نیو یارک ٹائمز کا یہ بھی کہنا ہے کہ بھارتی خبر رساں اداروں نے تو پاکستانی جوہری تنصیبات سے تابکاری کے اخراج کی خبر بھی نشر کر دی،  بھارتی میڈیا نے بغیر ثبوتوں کے حملے کی جگہ کی نشاندہی کیلئے تفصیلی نقشے بھی دکھائے، کراچی پر بھارتی بحریہ کے حملے کی کہانی بھی بڑے پیمانے پر پھیلائی گئی۔

 نیو یارک ٹائمز کے مطابق فیکٹ چیکنگ ویب سائٹ Alt News نے انکشاف کیا کہ آج تک اور نیوز 18 جیسے بڑے چینلز نے جھوٹی خبریں پھیلائیں۔

دفاعی ماہرین کا اس حوالے سے کہنا ہے کہ بھارتی میڈیا کا یہ رویہ علاقائی سلامتی کے لیے سنگین خطرہ ہے، جعلی خبروں کے اس سیلاب سے بھارت کی بین الاقوامی ساکھ کو ناقابل تلافی نقصان پہنچا ہے، غلط معلومات کے پھیلاؤ سے خطے میں کشیدگی بڑھ سکتی ہے اور نیوکلیئر اسکیلیشن کا خطرہ پیدا ہو سکتا ہے۔

سیاسی ماہرین نے کہا کہ بھارت میں مودی سرکار کے آنے کے بعد سے آزاد صحافت زوال پذیر ہو گئی ہے جبکہ میڈیا پر دباؤ بڑھ چکا ہے، غیر ملکی صحافتی اداروں پر بھی بھارتی حکومت کا دباؤ خطرناک حد تک بڑھ چکا ہے اور بین الاقوامی تنقید میں اضافہ ہو گیا ہے۔