فلسطین کی مزاحمت کار تنطیم حماس نے اکتوبر 2023 میں اغوا کیے گئے امریکی نوجوان شہری کو خیرسگالی کے طور پر رہا کردیا۔

برطانوی نشریاتی ادارے کی رپورٹ کے مطابق حماس نے مغوی بنائے گئے 21 سالہ ایڈن الیگزینڈر کو پیر کے روز رہا کر کے ریڈ کراس کے حوالے کیا۔

حماس کے سینئر رہنما نے کہا کہ امریکی صدر کے مشرق وسطیٰ دورے سے قبل خیر سگالی کے طور پر 21 سالہ ایڈن کو رہا کیا گیا ہے۔ انہوں نے واضح کیا کہ دیگر مغویوں کی رہائی امداد کی بحالی کے بعد ہی کی جائے گی۔

رپورٹ کے مطابق حماس نے اکتوبر 2023 میں 251 یہودیوں کو اغوا کیا تھا جس میں سے 59 اب تک غزہ میں ہیں اور 24 کے بارے میں امکان ہے کہ وہ اب بھی زندہ ہیں۔

اسرائیل نے امریکی نژاد شہری کی رہائی کی تصدیق کرتے ہوئے کہا کہ حماس نے الیکزینڈر کو محفوظ راستہ فراہم کیا اور یہ رہائی جنگ بندی کے نتیجے میں عمل میں نہیں آئی۔

واضح رہے کہ الیکزینڈر کی رہائی کے حوالے سے امریکی صدر نے پہلے ہی خوش خبری سناتے ہوئے کہا تھا کہ منگل کو مشرق وسطیٰ کے دوسرے دورے سے قبل ایک اچھی خبر ملے گی۔