بھارتی فضائیہ کو حالیہ مہینوں میں تربیتی اور آپریشنل شعبوں میں مسلسل شرمناک ناکامیوں کا سامنا کرنا پڑا ہے جس نے نہ صرف اس کی پیشہ ورانہ صلاحیتوں پر سوال اٹھا دیے ہیں بلکہ اس کی دفاعی تیاریوں کی قلعی بھی کھول دی ہے۔

بھارتی فضائیہ مختلف حادثات، تکنیکی خرابیوں اور ناقص تربیت جیسے سنگین مسائل سے دوچار ہے جس کا اعتراف خود بھارتی عسکری ماہرین اور ذرائع ابلاغ بھی کرچکے ہیں۔

گزشتہ دو برسوں میں بھارتی فضائیہ کے کئی جنگی اور تربیتی طیارے گر کر تباہ ہوچکے ہیں۔ 2 اپریل 2025 کو جام نگر کے قریب ایک جگوار لڑاکا طیارہ حادثے کا شکار ہوا جس کے نتیجے میں پائلٹ جان کی بازی ہار گیا۔

اس سے قبل 7 مارچ 2025 کو ایک ہی دن میں دو بڑے فضائی حادثات نے فضائیہ کی تیاریوں پر سوالیہ نشان لگا دیا۔

نومبر 2024 میں آگرہ کے قریب مگ 29 تربیتی پرواز کے دوران فنی خرابی کے باعث زمین بوس ہوا جب کہ اکتوبر 2024 میں بہار میں اے ایل ایچ ہیلی کاپٹر انجن فیل ہونے کے بعد ہنگامی لینڈنگ کے دوران شدید نقصان سے دوچار ہوا۔

جون 2024 میں ناسک، مہاراشٹرا میں سخوئی طیارہ تربیتی پرواز کے دوران گر کر تباہ ہوا جب کہ 3 اپریل 2024 کو لداخ میں ایک آپریشنل تربیتی مشن کے دوران اپاچی ہیلی کاپٹر کو شدید نقصان پہنچا۔

اسی طرح 12 مارچ 2024 کو راجستھان میں لائٹ کامبیٹ ایئرکرافٹ کریش ہوا اور 13 فروری 2024 کو مغربی بنگال میں ہاک ایم کے-132 تربیتی طیارہ تباہ ہوا۔

صورتحال اس وقت مزید سنگین ہوگئی جب 6 اور 7 مئی کو ہونے والے فضائی جھڑپ میں پاکستان نے بھارتی فضائیہ کے 6 طیارے مار گرائے جن میں 3 جدید رافیل طیارے بھی شامل تھے۔

واضح رہے کہ یہ واقعہ بھارتی فضائیہ کے لیے شدید خفت کا باعث بنا اور اس کی دفاعی صلاحیتوں پر کاری ضرب ثابت ہوا۔