واشنگٹن: امریکی صدر ڈونلڈ ٹرمپ نے مسئلہ کشمیر کے حل میں کردار ادا کرنے کیلئے دلچسپی کا اظہار کردیا۔

اپنے سوشل میڈیا پلیٹ فارم ٹرتھ سوشل پر ایک پوسٹ میں امریکی صدر ڈونلڈ ٹرمپ نے پاکستان اور بھارت کی قیادت کو دانشمندانہ، بہادرانہ اور دور اندیش فیصلوں پر زبردست خراجِ تحسین پیش کیا ہے۔

ان کا کہنا تھا کہ دونوں ممالک نے سمجھداری سے حالات کا ادراک کیا اور جارحیت سے گریز کا راستہ اپنایا، جو کہ نہایت اہم اور بروقت فیصلہ تھا۔

ٹرمپ نے کہا کہ اگر کشیدگی میں اضافہ ہوتا تو اس کے نتیجے میں لاکھوں معصوم جانیں خطرے میں پڑ سکتی تھیں، امریکہ کو اس تاریخی اور جرأت مندانہ فیصلے تک پہنچنے میں دونوں ممالک کی مدد کرنے پر فخر ہے۔

انہوں نے اس امید کا اظہار بھی کیا کہ امریکہ، بھارت اور پاکستان کے ساتھ تجارتی تعلقات کو نمایاں طور پر فروغ دے گا۔

امریکی صدر ٹرمپ کا مزید کہنا تھا کہ اگر دونوں ممالک سنجیدگی سے کوشش کریں تو مسئلہ کشمیر کا کوئی پُرامن حل تلاش کیا جا سکتا ہے۔