تہران: اسرائیل کی جانب سے ایران پر کیے گئے تازہ فضائی حملوں میں پاسدارانِ انقلاب کے سربراہ میجر جنرل حسین سلامی، ایرانی چیف آف اسٹاف میجر جنرل محمد باقری اور معروف جوہری سائنسدان فرید عباسی اور محمد مہدی سمیت متعدد اہم عسکری اور سائنسی شخصیات شہید ہو گئی ہیں۔

خبر رساں اداروں کے مطابق اسرائیلی فضائیہ نے تہران سمیت ایران کے مختلف شہروں میں درجنوں مقامات پر بمباری کی، دارالحکومت تہران کے شمال مشرقی علاقوں میں شدید دھماکوں کی آوازیں سنی گئیں اور کئی مقامات سے دھویں کے بادل بلند ہوتے دکھائی دیے۔

ایرانی سرکاری ٹیلی ویژن نے تصدیق کی ہے کہ ان حملوں کا ہدف پاسدارانِ انقلاب کا صدر دفتر بھی تھا، جس میں ایرانی چیف آف اسٹاف میجر جنرل محمد باقری کے شہید ہونے کی اطلاع ہے۔

اطلاعات کے مطابق ختم الانبیا ہیڈکوارٹر کے کمانڈر میجر جنرل غلام علی راشد بھی ان حملوں میں شہید ہو گئے ہیں۔

علاوہ ازیں تہران کے رہائشی علاقوں پر بھی بمباری کی گئی، جس کے نتیجے میں متعدد عام شہری جاں بحق ہوئے، جن میں بچے بھی شامل ہیں۔

ایرانی حکام نے دارالحکومت تہران میں ہائی الرٹ جاری کر دیا ہے اور عوام کو احتیاط برتنے کی ہدایت کی گئی ہے، تاہم موجودہ صورتحال کے پیش نظر خطے میں کشیدگی کے مزید شدت اختیار کرنے کا خدشہ ظاہر کیا جا رہا ہے۔