ایران اور اسرائیل کے درمیان جاری کشیدگی کے دوران بھارت نے اسرائیل کے ساتھ اتحاد کرتے ہوئے ایک گمراہ کن اطلاعاتی مہم شروع کردی ہے۔ اس پراپیگنڈے کا مقصد خطے میں اثر و رسوخ کی بحالی اور اپنے اشتعال انگیز اقدامات سے توجہ ہٹانا ہے۔

بھارت اور اسرائیل کے اشتراک سے قائم نیٹ ورکس نے پاکستان، چین اور روس پر ایران کی حمایت کے جھوٹے الزامات لگانا شروع کر دیے ہیں تاکہ عالمی رائے عامہ کو گمراہ کیا جا سکے۔

یہ پراپیگنڈا دراصل ایک تیار کردہ بیانیہ ہے جس کا مقصد مصنوعی اتحاد کا تاثر دے کر ایران کو تنہا کرنا اور مخالفین پر دباؤ بڑھانا ہے۔

ایران کو پاکستان، چین یا روس کی جانب سے کسی قسم کی فوجی یا خفیہ امداد کے کوئی مستند انٹیلی جنس شواہد موجود نہیں ہیں۔ یہ سب کچھ ایک منظم ہند-اسرائیلی اطلاعاتی آپریشن کا حصہ معلوم ہوتا ہے۔

یہ بیانیہ کسی غیر جانبدار تجزیے پر مبنی نہیں بلکہ ایک دانستہ کوشش ہے جس کے ذریعے خودمختار ریاستوں کی پالیسیوں کو جنگی حمایت سے جوڑنے کی کوشش کی جا رہی ہے، وہ بھی بغیر کسی ثبوت کے۔

پاکستان کا مؤقف ہمیشہ واضح اور اصولی رہا ہے۔ پاکستان نہ تو کسی کی مسلط کردہ جنگ میں شامل ہوتا ہے اور نہ ہی خطے میں بدامنی کا حامی ہے۔ ان جھوٹے الزامات کو سیاسی مقاصد کے لیے گھڑا گیا ہے تاکہ پاکستان کو بدنام کیا جاسکے۔

ماہرین نے اس امر کی نشاندہی کی ہے کہ جب بھی بھارت یا اسرائیل کو بین الاقوامی سطح پر تنقید کا سامنا ہوتا ہے تو اس طرح کے جھوٹے پراپیگنڈے سے دوسرے ممالک کو نشانہ بنایا جاتا ہے تاکہ اصل مسئلے سے توجہ ہٹائی جاسکے۔

موجودہ پراپیگنڈا بھی اسی سلسلے کی ایک کڑی ہے جس کے تحت ایک مبینہ ’’اینٹی ویسٹ بلاک‘‘ کا مفروضہ تخلیق کیا جارہا ہے۔ اس چال کا مقصد کثیرالجہتی سفارت کاری کو بدنام کرنا اور اپنی پالیسی ناکامیوں پر پردہ ڈالنا ہے۔