تہران: ایران کے سپریم لیڈر آیت اللہ سید علی خامنہ ای نے حالیہ ایران-اسرائیل تنازعے میں صہیونی ریاست کے خلاف ایرانی کارروائی کو ایک تاریخی فتح قرار دیتے ہوئے قوم کو مبارکباد پیش کی ہے۔

ایرانی سپریم لیڈر نے اپنے بیان میں کہا کہ ایرانی قوم نے جس اتحاد، شجاعت اور فہم و بصیرت کا مظاہرہ کیا، اس نے دشمن کو حیران و پریشان کردیا ہے۔

انہوں نے کہا ’’میں ایرانی عوام کو صہیونی ریاست کے خلاف عظیم الشان فتح پر دل کی گہرائیوں سے مبارکباد دیتا ہوں۔ ہماری 9 کروڑ کی قوم ایک آواز، ایک صف، شانہ بشانہ اپنی افواج کے ساتھ کھڑی ہوئی اور دنیا کو دکھا دیا کہ وقت آنے پر ایرانی قوم ایک سیسہ پلائی دیوار بن سکتی ہے‘‘۔

آیت اللہ خامنہ ای نے مزید کہا کہ صہیونی حکومت کے بڑے بڑے دعوے اور جدید دفاعی نظام ایرانی حملوں کے سامنے بے اثر ثابت ہوئے۔

ان کا کہنا تھا کہ ایرانی افواج نے اسرائیل کے کثیر سطحی دفاعی نظام کو توڑ کر رکھ دیا۔ یہ ایک عسکری نہیں بلکہ ایمانی قوت کی جیت ہے۔ ہم نے طاقتور صہیونی ریاست کو اللہ پر ایمان، قومی وحدت اور عزم و حوصلے کے ذریعے شکست دی۔

امریکا کے کردار پر تنقید کرتے ہوئے انہوں نے کہا ’’امریکا اس جنگ میں صرف اس لیے کودا کیونکہ اسے خدشہ تھا کہ اگر وہ ایسا نہ کرتا تو اسرائیل مکمل تباہ ہو جاتا مگر اس کے باوجود، امریکا کو کوئی کامیابی حاصل نہیں ہوئی۔ یہ اس کی بڑی ناکامی ہے۔

انہوں نے ایرانی قوم کے جذبے کو سراہتے ہوئے کہا کہ اسلامی جمہوریہ ایران نے صہیونی ریاست کے تمام تر دعوؤں، جنگی برتری اور عالمی حمایت کو پاش پاش کردیا۔ ہم نے دنیا کو دکھا دیا کہ ایران کبھی سرنڈر نہیں کرے گا۔ ہمارا عزم، ہمارے ایمان سے جڑا ہے۔

سپریم لیڈر نے اپنے خطاب کے اختتام پر ایرانی عوام، مسلح افواج اور قیادت کو خراج تحسین پیش کیا اور اس فتح کو ملتِ ایران کی صدیوں پرانی جدوجہد کا تسلسل قرار دیا۔