دمشق: اسرائیلی فوج نے دمشق میں شامی فوج کے ہیڈکوارٹر پر حملہ کردیا جب کہ ساتھ ہی سویڈا میں بھی کارروائی جاری رکھی ہوئی ہے۔

غیر ملکی خبر رساں ادارے کی رپورٹ کے مطابق اسرائیلی فوج نے دعویٰ کیا ہے کہ اس نے شامی دارالحکومت دمشق میں واقع شامی فوج کے ہیڈکوارٹر کے داخلی دروازے کو فضائی حملے میں نشانہ بنایا ہے۔ حملے کے فوراً بعد دمشق میں زور دار دھماکے کی آواز سنی گئی۔

اسرائیلی فوج نے علیحدہ بیان میں بتایا کہ وہ جنوبی شام کے دروز اکثریتی شہر سویڈا پر بھی حملہ کر رہی ہے اور مختلف ممکنہ صورتحال کے لیے تیار ہے۔

قبل ازیں شامی سرکاری خبر رساں ادارے نے اطلاع دی تھی کہ اسرائیلی ڈرون حملوں کے نتیجے میں سویڈا شہر میں شہری جاں بحق ہوئے ہیں۔

اسرائیلی کی شام کو مزید حملوں کی دھمکی

اسرائیلی وزیر دفاع یواف گیلنٹ نے دھمکی دی ہے کہ اگر شامی حکومت سویڈا شہر سے اپنی فوجیں واپس نہیں بلاتی تو اسرائیل اپنے حملے جاری رکھے گا۔

انہوں نے کہا ’’اگر پیغام نہ سمجھا گیا تو ہم اپنی کارروائیوں میں شدت لائیں گے‘‘۔

دوسری جانب شامی وزارتِ دفاع نے بتایا کہ ممنوعہ گروہوں نے شامی افواج پر حملے کرکے سیزفائر کی خلاف ورزی کی ہے۔ مقامی میڈیا نے اطلاع دی ہے کہ سویڈا اور آس پاس کے دیہات پر شدید گولہ باری کی جا رہی ہے۔

رپورٹ کے مطابق اسرائیل ’’دروز برادری کے تحفظ‘‘ کے نام پر شام پر حملے کر رہا ہے تاکہ جنوبی شام میں اپنی موجودگی کو مزید مستحکم کیا جاسکے۔

منگل کے روز بھی اسرائیل نے شامی فوجی ٹھکانوں پر فضائی حملے کیے تھے اور کہا تھا کہ یہ حملے سرحدی علاقوں کو غیر عسکری بنانے اور دروز برادری کو تحفظ دینے کے لیے کیے جارہے ہیں۔