دوحہ: عرب اسلامی ہنگامی سربراہی اجلاس کے موقع پر امیر قطر شیخ تمیم بن حمد الثانی نے اسلامی ممالک کو متحد ہوکر فلسطینی عوام کی حمایت کا مطالبہ کردیا۔

قطر کے دارالحکومت دوحہ میں عرب اسلامی ہنگامی سربراہی اجلاس منعقد ہوا جس میں مسلم ممالک کے سربراہان اور اعلیٰ نمائندگان نے شرکت کی۔

اجلاس سے خطاب کرتے ہوئے امیر قطر شیخ تمیم بن حمد الثانی نے فلسطین میں جاری اسرائیلی جارحیت اور مظالم کی شدید الفاظ میں مذمت کی۔

امیر قطر نے کہا کہ اسرائیل کے ہاتھوں فلسطینی عوام کی نسل کشی کی جا رہی ہے اور صیہونی حکومت انسانیت کے خلاف جرائم میں تمام حدیں پار کرچکی ہے۔

ان کا کہنا تھا کہ ’’گریٹر اسرائیل‘‘ کا ایجنڈا نہ صرف خطے بلکہ عالمی امن کے لیے بھی سنگین خطرہ ہے۔

قطر کی کوششیں اور اسرائیلی اقدامات پر کڑی تنقید

شیخ تمیم نے کہا کہ قطر نے ہمیشہ ثالث کے طور پر خطے میں امن کے لیے مخلصانہ کوششیں کیں لیکن اسرائیل نے مذاکراتی عمل کو سبوتاژ کرتے ہوئے حماس کی قیادت کو نشانہ بنایا۔

انہوں نے مزید کہا کہ یرغمالیوں کی پرامن رہائی کے حوالے سے اسرائیل کے تمام دعوے جھوٹے اور گمراہ کن ہیں۔

خطے کی سالمیت اور خودمختاری پر خدشات

امیر قطر نے زور دیا کہ اسرائیل کی جانب سے قطر سمیت خطے کے دیگر ممالک کی خودمختاری اور علاقائی سالمیت کی خلاف ورزی کسی طور قابل قبول نہیں۔

انہوں نے کہا کہ صیہونی حکومت کے اقدامات انسانی اقدار اور عالمی قوانین کی صریح خلاف ورزی ہیں، جنہیں کسی طور برداشت نہیں کیا جا سکتا۔

امیر قطر نے اسلامی ممالک کے رہنماؤں کو خوش آمدید کہتے ہوئے کہا کہ اس وقت امت مسلمہ کو متحد ہو کر فلسطینی عوام کے حق میں آواز بلند کرنی چاہیے تاکہ خطے میں دیرپا امن قائم ہوسکے۔