واشنگٹن: امریکی صدر ڈونلڈ ٹرمپ نے سینیٹ اور کانگریس سے منظور شدہ بل پر دستخط کرتے ہوئے ملک کی تاریخ کے سب سے طویل حکومتی شٹ ڈاؤن کا باضابطہ خاتمہ کر دیا۔

43 روز تک جاری رہنے والے اس شٹ ڈاؤن کے باعث امریکی وفاقی محکمے مفلوج رہے اور لاکھوں سرکاری ملازمین متاثر ہوئے، تاہم شٹ ڈاؤن کے خاتمے کے لیے کانگریس میں 222 ووٹ حق میں اور 209 مخالفت میں ڈالے گئے۔

امریکی صدر ٹرمپ نے کہا کہ شٹ ڈاؤن کے باوجود امریکی معیشت مستحکم رہی، اسٹاک مارکیٹ بلند ترین سطح پر پہنچ گئی ہے اور حصص کی قیمتوں میں 48 فیصد اضافہ ہوا۔

انہوں نے ڈیموکریٹ ارکان کی تعریف کرتے ہوئے کہا کہ جن اراکین نے شٹ ڈاؤن کے خاتمے میں تعاون کیا، وہ قابلِ تحسین ہیں۔

صدر ٹرمپ نے اعلان کیا کہ مستقبل میں کسی کو دوبارہ شٹ ڈاؤن کی کوشش نہیں کرنے دی جائے گی۔

 انہوں نے مزید کہا کہ عوام کو صحت، امن و امان اور مہنگائی میں کمی کے واضح اثرات نظر آئیں گے جبکہ کم آمدن والے طبقے کے لیے ٹیکس میں مزید رعایتوں پر کام جاری ہے۔