صدر پاکستان تحریک انصاف خیبر پختونخوا و سابق وفاقی وزیر پرویز خٹک نے کہا ہے کہ حکومت ملک کی بدنامی کروانے پر تلی ہوئی ہے۔

تفصیلات کے مطابق صدر پاکستان تحریک انصاف خیبر پختونخوا پرویز خٹک نے سابق اسپیکر قومی اسمبلی اسد قیصر اور خیبرپختونخوا کے وزیر خزانہ تیمور سلیم جھگڑا کے ہمراہ خیبر پختونخوا ہائوس میں اہم پریس کانفرنس کی جس میں ان کا کہنا تھا کہ جب ہماری حکومت آئی تو چوروں نے ہمارے خلاف پروپیگنڈا کیا۔

پرویز خٹک نے کہا کہ یہ حکومت چوں چوں کا مربہ ہے، ان تجربہ کاروں کے پاس کوئی پلان نہیں ہے۔

ان کا کہنا تھا کہ اس دور میں بھی میڈیا کے ساتھ ظلم و ستم ہو رہا ہے، حکومت نے ظلم کی بدترین مثال قائم کی ہے۔

انہوں نے کہا کہ ہم تمام تر چیزوں کا سامنا کریں گے، تاریخی مہنگائی پر میڈیا خاموش ہے، یہ ملک ایسے نہیں چل سکتا۔

پرویز خٹک نے کہا کہ یہ کہاں تک چھپیں گے؟ ہم نے ہمیشہ ڈیلیور کر کے دکھایا، ہر میدان میں عمران خان نے کارکردگی دکھائی، پاکستان کا عالمی سطح پر تشخص بحال کیا لیکن اس بھکاری حکومت نے صرف ملک کی بدنامی کروائی۔

صدر پاکستان تحریک انصاف خیبر پختونخوا نے کہا کہ اس حکومت نے احتساب کا نظام تباہ کر دیا، اوورسیز پاکستانیوں کا ووٹ ختم کر دیا، ای وی ایم مشین کو ختم کر دیا، یہ لوگ اپنی چوری بچانے کے لیے حکومت میں آئے ہیں۔

ان کا کہنا تھا کہ عمران خان دوبارا اکثریت کے ساتھ آئے گا، لوگ عمران خان کے ساتھ ہیں، ملک کو آگے لے جانے کیلئے صاف شفاف انتخابات ضروری ہیں۔

انہوں نے مزید کہا کہ ملک میں سیاسی اور معاشی عدم استحکام ہے۔