بھارت میں فضائی آلودگی میں خطرناک حد تک اضافے کی وجہ سے  نوبت یہاں تک پہنچ چکی ہے کہ دیوی اور دیوتاؤں کو بھی ماسک پہنا دیا گیا ہے۔

انتہا پسند مودی کے دیس میں بڑھتی فضائی آلودگی نے شہریوں کو مختلف بیماریوں کا شکار بنا دیا ہے۔

حالات اتنے خراب ہیں کہ پنڈتوں کو پریشانی لگ گئی ہے کہ کہیں لوگوں کے ساتھ ساتھ بھگوان بھی بیمار نہ ہوجائیں۔

شہر واراناسی بھارتی وزیراعظم نریندر مودی کا حلقہ انتخاب ہے، جہاں مندر کے پنڈت نے دیوی دیوتاؤں کو فضائی آلودگی سے بچانے کے لیے  چہروں پر ماسک پہنا دیئے ہیں۔

 ریاست اتر پردیش کے ایک مندر میں رکھے ہوئے شنکر دیوتا اور ان کی دیویاں پاروتی، درگا اور کالی ماتا سمیت سائیں بابا کی مورتیاں بھی ماسک پہنے ہوئے ہیں جس سے ان کا منہ اور ناک ڈھکا ہوا ہے۔

 ایک پنڈت ہریش مشرا نے میڈیا کو بتایا کہ فضا میں زہریلے مواد میں خطرناک حد تک اضافہ ہوا ہے جس سے محفوظ رکھنے کے لیے ہم دیوی دیوتاؤں کو ماسک پہنانے پر مجبور ہوگئے ہیں۔

پنڈت پریش مشرا نے مزید انکشاف کیا کہ سردیوں میں ہم ان مورتیوں کو کمبلوں سے ڈھانپ دیتے ہیں تاکہ سخت سردی سے محفوظ رہیں۔ ماسک پہنے ان دیوی دیوتاؤں کی وجہ سے مندر میں لوگوں کی آمد میں اضافہ ہوگیا ہے۔

واضح رہے کہ عالمی تنظیموں کی جانب سے بھارتی شہر دنیا کے آلودہ ترین شہر قرار دیئے جاچکے ہیں جہاں ہر شخص اپنے منہ پر ماسک لگائے فضائی آلودگی کے مضر اثرات سے بچنے کی کوششوں میں ہے۔