سوشل میڈیا پر ایک ویڈیو خوب وائرل ہورہی ہے جس میں ماں اور بیٹی نے پرواز اڑا کر سب کو حیران کردیا ہے۔

کولوراڈو کی ساؤتھ ائیر لائن میں پائلٹ ماں اور بیٹی نے ایک ساتھ کمرشل پرواز اڑائی جس کی ویڈیو سوشل میڈیا پر تیزی سے وائرل ہو رہی ہے، پرواز کے اڑان بھرنے سے پہلے دونوں پائلٹ ماں بیٹی نے فلائٹ کا اعلان کیا اور ایک دوسرے کو گلے لگا کر حوصلہ افزائی بھی کی۔

خاتون پائلٹ نے پرواز میں اعلان کرتے ہوئے مسافروں کو بتایا کہ آج ان کے ساتھ ان کی بیٹی بھی بطورِ پائلٹ جہاز اڑائے گی، یہ سننے کے بعد جہاز میں سوار مسافروں نے تالیاں بجا کر ان کی حوصلہ افزائی کی۔

رپورٹ میں کہا گیا کہ ہولی نامی خاتون پائلٹ نے کالج کی تعلیم حاصل کرنے کے بعد فلائٹ اٹینڈنٹ کے طور پر ایوی ایشن کیریئر کا آغاز کیا، اس دوران انہیں احساس ہوا کہ وہ پائلٹ بننا چاہتی ہیں اور انہوں نے اپنی پرواز کے اسباق اس وقت حاصل کیے جب کیلی صرف دو سال کی تھیں۔

ان کا کہنا تھا کہ ان کے مزید دو بچے ہیں لیکن خاندانی دباؤ نے کبھی انہیں اپنے خواب کو پورا کرنے سے نہیں روکا۔