وفاقی حکومت نے سکھوں کے مذہبی پیشوا بابا گرونانک کے 550 ویں جنم دن کے موقع پر 50 روپے کا یادگاری سکّہ جاری کردیا۔

حکومت کی جانب سے جاری کردہ یادگاری سکّے کے ایک رخ پر اسلامی جمہوریہ پاکستان اور قومی نشان کندہ ہے، جبکہ دوسرے رخ پر سکھوں کی مذہبی عبادت گاہ کی تصویر ہے، ساتھ ہی گرو نانک دیو جی 1469-2019 کے الفاظ درج ہیں۔

یہ یادگاری سکّہ 50 روپے مالیت کا ہے، یادگاری سکہ سکھ برادری کے عہدے داروں کو پیش کیا گیا۔ سکھ برادری نے سکّے کے اجرا پر خوشی کا اظہار کیا ہے۔

خیال رہے کہ پاکستان نے سکھوں کے پہلے گرو بابا گرو نانک کے 550 ویں جنم دن کے موقع پر خصوصی انتظامات کیے ہیں۔ گذشتہ ہفتے نارووال ضلع میں واقع گردوارہ دربار صاحب کرتارپور تک انڈین شہریوں کو بغیر ویزے مذہبی رسومات کی ادائیگی کے لیے راہداری کھولنے کے معاہدے پر بھی دستخط ہوئے اور نو نومبر کو اس کا باقاعدہ افتتاح کر دیا جائے گا۔

کرتار پور راہداری پاکستان کے ضلع نارووال کے گاؤں کرتار پور اور انڈیا کے ضلع گورداس پور کے علاقے نانک صاحب کے درمیان راستے کو کہا جاتا ہے۔ ڈیرہ نانک صاحب اور گوردوارہ کرتار پور کے درمیان قریباً چار کلومیٹر کا فاصلہ ہے۔ سکھ برادری اسے کھولنے کا مطالبہ عرصہ دراز سے کر رہی تھی۔

گردوارہ دربار صاحب کرتار پور بابا گرونانک کی آخری آرام گاہ ہونے کی وجہ سے انڈیا اور دنیا بھر میں بسنے والی سکھ برادری کا مقدس ترین مقام ہے۔

اسی سلسلے میں پیر کو وزیراعظم عمران خان نے ننکانہ صاحب میں گرونانک یونیورسٹی کا بھی سنگ بنیاد رکھا ہے۔