اسلام آباد: وزیر عمران خان نے وفاقی کابینہ کا اجلاس آج طلب کرلیا ہے جس میں 15 نکاتی ایجنڈے سمیت مختلف امور زیر غور آئیں گے۔

وزیراعظم عمران خان کی زیرصدارت وفاقی کابینہ کا اجلاس آج ہوگا جس میں وفاقی کابینہ 15 نکاتی ایجنڈا پر غور کرے گی جبکہ پاکستان اور تاجکستان کے درمیان بین الاقوامی ہوائی روٹ کے قیام کی منظوری دے جائے گی۔

وفاقی کابینہ قازقستان کی سکیٹ ایئرلائن کے ڈیزگنیشن کی منظوری دے گی اور کابینہ افغان شہریوں کو دوسرے ممالک جانے کے لیے پاکستانی سرزمین استعمال کرنے کی اجازت کے معاملے پر غور کرے گی۔

آج کے اجلاس میں شوگر انڈسٹری ریفارم کمیٹی کی رپورٹ کابینہ میں پیش کی جائے گی اور اجلاس میں افغانستان سے متعلق پاکستان کی ویزا پالیسی معاملے پر بھی غور ہوگا جبکہ کابینہ افغانستان میں بین الاقوامی فلاحی اداروں کے ریلیف کاموں کے میکنزم کی منظوری دے گی۔

وفاقی کابینہ بین الاقوامی این جی اوز کی ویزا پالیسی کو اسٹریم لائن کرنے کی منظوری دے گی جبکہ پاکستان اور عراق کے درمیان ایئرسروسز معاہدے میں کوڈ شیئرنگ شامل کرنے کا معاملہ بھی کابینہ ایجنڈا کا حصہ ہے۔

کابینہ پرانے کرنسی نوٹوں کی تبدیلی کی تاریخ میں توسیع کی منظوری دے گی اور کابینہ چینی کمپنی کے 33 فیصد آپریٹرشپ پاکستان پیٹرولیم لمیٹڈ کو منتقل کرنے کے معاملے پر غور کرے گی۔

اوگرا کی سالانہ رپورٹ برائے سال 2019 تا 20 کابینہ اجلاس میں پیش کی جائے گی اور وفاقی کابینہ اقتصادی رابطہ کمیٹی اجلاس کے فیصلوں کی توثیق کرے گی جبکہ کابینہ کمیٹی برائے ادارہ جاتی اصلاحات اور توانائی کے اجلاسوں کے فیصلوں کی توثیق بھی متوقع ہے۔