آئل مارکیٹنگ کمپنیز نے پیٹرولیم مصنوعات کی قیمتوں پر نظر ثانی کا مطالبہ کردیا۔

تفصیلات کے مطابق روپے کی قدر میں مسلسل کمی کے باعث آئل مارکیٹنگ کمپنیز کی ایڈوائزری  کونسل نے حکومت کو خبردار کرتے ہوئے  پیٹرولیم مصنوعات  کی قیمتوں پر نظر ثانی کا مطالبہ کیا ہے۔

اس ضمن میں آئل مارکیٹنگ کمپنیز نے حکومت کو خط لکھ دیا ہے۔

یہ بھی پڑھیں: وزیر مملکت برائے پیٹرولیم نے عوام کو بڑی خوشخبری سنادی

خط میں شرح سود میں اضافے اور قیمتوں کے تعین کے مروجہ طریقہ کار پر شدید تحفظات کا اظہار کہا گیا کہ  شرح مبادلہ اور پیٹرولیم مصنوعات کی قیمتوں کے موجودہ طریقہ کار سے کمپنیز کو اربوں روپے کا نقصان ہو رہا ہے۔

آئل مارکیٹنگ کمپنیز نے شفاف طریقہ کار وضع کرنے کی درخواست کرتے ہوئے کہا کہ موجودہ طریقہ کار جاری رکھنے سے سپلائی چین میں خلل پیدا ہو سکتا ہے، حکومت فوری طور پر موجودہ شرح مبادلہ کی بنیاد پر پیٹرولیم مصنوعات  کی قیمتوں پر نظر ثانی کرے۔

خط میں موقف اپنایا گیا کہ منظور شدہ ایل سیز کھولنے کی لاگت کئی گنا بڑھ گئی ہے۔ ہائی اسپیڈ ڈیزل کی مد میں حالیہ مہینوں میں تقریباً 35 ارب روپے کے مجموعی نقصانات ہوئے۔

یہ بھی پڑھیں: موٹر سائیکل کی قیمتوں میں ایک بار پھر ہوشربا اضافہ

آئل مارکیٹنگ کمپنیز نے خط میں مزید کہا کہ ہائی اسپیڈ ڈیزل کی قیمت میں بھی 18 فیصد اضافہ ہوا ہے۔ گزشتہ سال کے مقابلے اتنی ہی مقدار میں ڈیزل در آمد کرنے کے لیے 90 فیصد زیادہ اخراجات کی ضرورت ہے۔