اسلام آباد: پاکستان اور امریکی کاروباری اداروں کے درمیان مضبوط تجارتی تعلقات کے فروغ پر اتفاق کیا گیا ہے۔

وزیر تجارت جام کمال خان سے امریکن بزنس کونسل کے وفد نے ملاقات کی جس میں نو امریکی کمپنیوں کے نمائندے اور امریکی سفارت خانے کے افسران شریک ہوئے۔

امریکی کمپنیوں نے ٹیکس، مہنگائی اور سازگار کاروباری ماحول کی فراہمی پر گفتگو کی جب کہ امریکی کمپنیوں نے پاکستانی معیشت میں کردار اور سرمایہ کاری کا اعتراف کیا۔

وزیر تجارت جام کمال خان نے وفد کو یقین دہانی کروائی کہ حکومت کاروباری مشکلات کے حل کے لیے پرعزم ہے۔ کاروباری چیلنجز کا ادراک ہے، معاشی ماحول بہتر بنانے پر کام جاری ہے۔

پاکستان اور امریکہ کے درمیان مضبوط تجارتی تعلقات کے فروغ پر اتفاق کیا گیا جب کہ امریکن بزنس کونسل نے بتایا کہ امریکی کمپنیاں پاکستان میں ملازمتوں کے مواقع فراہم کر رہی ہیں۔

حکومت اور امریکی کاروباری اداروں کے درمیان تعاون جاری رکھنے پر زور دیا گیا، جام کمال نے نے یہ بھی بتایا کہ غیر ملکی سرمایہ کاری کے فروغ کے لیے اقدامات کیے جا رہے ہیں۔