راولپنڈی: ڈی جی آئی ایس پی آر لیفٹیننٹ جنرل احمد شریف چوہدری نے سمر انٹرن شپ 2025 میں شریک طلباء سے خصوصی گفتگو کی اور نوجوانوں کے جذبے کو سراہا۔

 سمر انٹرن شپ کا یہ سلسلہ کامیابی کے ساتھ جاری ہے، جس میں ملک بھر سے طلباء بھرپور حصہ لے رہے ہیں۔

اس سال سمر انٹرن شپ میں پاکستان کی 150 سے زائد یونیورسٹیوں اور تعلیمی اداروں کے طلباء شریک ہیں جبکہ 33 شہروں سے تعلق رکھنے والے 6,500 سے زائد نوجوان اس پروگرام کا حصہ بن چکے ہیں۔

طلباء نے گفتگو کے دوران پاکستان کی مسلح افواج سے اپنی بھرپور وابستگی اور اعتماد کا اظہار کرتے ہوئے کہا کہ ہمیں اپنی افواج پر فخر ہے اور ہمیں ان سے کوئی جدا نہیں کر سکتا۔

طلباء نے آپریشن بنیان مرصوص میں بھارت کو دیے گئے منہ توڑ جواب کو تاریخی قرار دیتے ہوئے کہا کہ یہ کارروائی ہمیشہ تاریخ میں یاد رکھی جائے گی۔

نوجوانوں نے ملک دشمن عناصر کے خلاف واضح پیغام دیتے ہوئے کہا کہ ہم دشمن کے ناپاک عزائم کو کبھی کامیاب نہیں ہونے دیں گے۔

انہوں نے اس عزم کا اعادہ کیا کہ نوجوان نسل کل بھی پاکستان کے ساتھ کھڑی تھی، آج بھی ہے اور مستقبل میں بھی ہمیشہ ساتھ رہے گی۔

سمر انٹرن شپ 2025 کا یہ پروگرام نہ صرف نوجوانوں کو پاک افواج کے نظام اور قربانیوں سے روشناس کر رہا ہے بلکہ ان میں حب الوطنی، یکجہتی اور ذمہ داری کا شعور بھی پیدا کر رہا ہے۔