راولپنڈی: حوالدار لالک جان شہید نشان حیدر کا 26 واں یوم شہادت آج منایا جارہا ہے، تاہم پاک فوج کی جانب سے حوالدار لالک جان شہید کو خراج عقیدت پیش کیا گیا ہے۔

پاک فوج کے شعبہ تعلقات عامہ (آئی ایس پی آر) کے مطابق حوالدار لالک جان شہید نشان حیدر کے 26 ویں یوم شہادت پر فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی نیول چیف اور ایئر چیف نے مادرِ وطن کے عظیم سپوت کو خراجِ عقیدت پیش کیا ہے۔

ترجمان پاک فوج نے بتایا کہ کارگل جنگ 1999 میں حوالدار لالک جان شہید نے بے مثال جرات اور قربانی کی تاریخ رقم کی، 7 جولائی 1999 کو شہید نے دشمن کے حملوں کیخلاف بےمثال  جرات و بہادری کا مظاہرہ کیا، انہوں نے شدید زخمی ہونے کے باوجود پوسٹ کا دفاع جاری رکھا۔

آئی ایس پی آر کے مطابق حوالدار لالک جان نے اپنی پوسٹ چھوڑنے سے انکار کرتے ہوئے اپنی شہادت تک لڑائی جاری رکھی، افواج پاکستان ان کی قربانی کو بے حد احترام اور سپاس گزاری کے ساتھ یاد رکھتی ہیں۔

ترجمان پاک فوج نے مزید کہا کہ حوالدار جان شہید کی قربانی افواج پاکستان کے لیے آج اور آئندہ نسلوں کے لیے بھی مشعلِ راہ ہے، مسلح افواج اور قوم شہداء پاکستان کے مشن کو جاری رکھنے اور مادرِ وطن کے دفاع کیلئے جرات، وفا اور قربانی کا سفر جاری رکھنے کے عزم کا اعادہ کرتی ہیں۔