ملک بھرمیں تعلیمی ادارے مرحلہ وار 25 جنوری سے کھولنے کی تجویز پرفیصلہ پیرکوکیاجائے گا۔

تفصیلات کے مطابق  ملک بھرکے تعلیمی ادارے 25 جنوری سے مرحلہ وارتین حصوں میں کھولنے کی تجویز سامنے آئی ہے ۔

وفاقی حکومت کی جانب سے اسکول کھولے جانے سے متعلق حتمی فیصلہ پیر 4 جنوری کو وفاقی وزیر تعلیم شفقت محمود کی زیر صدارت ہونے والی بین الصوبائی وزرائے تعلیم کانفرنس  کیا جائے گا ۔

ملک بھر کے تعلیمی ادارے دوبارہ کھولنے کا فیصلہ ہیلتھ ایڈوائزری کی بنیاد پر کورونا کیسز کو مد نظر رکھتے ہوئے کیا جائے گا۔

تجویز  میں کہا گیا ہے کہا پہلے مرحلے میں ملک بھر کے سرکاری و نجی پرائمری اسکولز 25 جنوری 2021 سے کھول دیے جائیں جبکہ دوسرے مرحلے میں 4 فروری سے مڈل /سیکنڈری اسکولز کھول دیے جائیں اور تیسرے مرحلے میں ہائرمڈل/سیکنڈری اور اس کے مساوی تعلیمی ادارے کھولے جائیں۔

ذرائع محکمہ تعلیم کا کہنا ہے کہ اسکول کھولنے سے متعلق یہ تینوں تاریخیں مجوزہ ہیں اور اگر کوروناکی صورتحال بدستور خراب رہی تو 19 جنوری کو دوبارہ بین الصوبائی وزرائے تعلیم کانفرنس بلاکر اس پر غور اور رد بدل کیا جاسکتا ہے ۔

دوسری جانب ملک بھر میں اسکولز اور بورڈز کی سطح پر امتحانات مئی کے آخریا پھر جون کے اوائل سے شروع کرنے کی تجویز  بھی زیر غور ہے ۔

اس سے قبل اکیڈمک کورس ورک کی تکمیل کرلی جائے گی اسی طرح گرمیوں کی تعطیلات کا دورانیہ کم کیا جائے گا اور نیا تعلیمی سال 2021 اگست سے شروع کیا جائے گا۔

واضح رہے کہ 26 نومبر2020 سے دوبارہ تعلیم ادارے دوبارہ بند ہوگئے تھے اور انہیں 11 جنوری سے کھولنے کا اعلان کیا گیا تھا۔