شہر آفاق ٹی وی سیریز گیم آف تھرونز نے 2019 کے بہترین ڈرامہ سیریز کا ایمی ایوارڈ اپنے نام کر لیا ہے۔

سیریز کا آخری سیزن شائیقن کوگذشتہ 7 سلسلوں کے مقابلے میں زیادہ متاثر کرنے میں ناکام رہا تھا۔ تاہم گیم آف تھرونز نے تنقید کے باوجود بہترین ڈرامہ سیریز کا ایمی ایوارڈ جیتا ہے۔

فینٹیسی سیریز جو اس سے قبل لگاتار آٹھ مرتبہ ایمی ایوارڈ کے لئے نامزد ہو چکی ہے جن میں سے تین مرتبہ اس نے یہ ایوارڈ جیتا ہے۔

گیم آف تھرونز کی تیسری قسط ’’ دی لانگ نائٹ ‘‘ ڈرامہ سیریز کی تاریخ کی سب سے زیادہ دیکھے جانے والی قسط تصور کی جاتی ہے تاہم یہ شائقین کو زیادہ متاثر کرنے میں ناکام رہی اور سماجی رابطے کی مختلف ویب سائٹس پر دنیا بھر سے 10 لاکھ سے زائد مداحوں نے اس قسط کو دوبارہ بنانے کے لئے آن لائن درخواستیں دائر کی۔

گیم آف تھرونز بنیادی طور پر مصنف جارج آر آر مارٹن کے ’اے سانگ آف آئس اینڈ فائر‘ نامی ناول پر مبنی کہانی ہے۔ لیکن ٹیلی ویژن کی ضروریات کو مدنظر رکھتے ہوئے کچھ تبدیلیاں بھی کی گئیں۔

گیم آف تھرونز کا شمار مقبول ترین ڈرامہ سیریز میں ہوتا ہے جس کے دنیا بھر میں کروڑوں مداح موجود ہیں۔

اس ڈرامے نے اب تک 47 ایمی ایوارڈز جیتے ہیں جو کسی بھی ڈرامے کی جانب سے جیتے جانے والے سب سے زیادہ ایوارڈز ہیں۔

گیم آف تھرونز کا آٹھواں اور آخری سیزن 19 مئی کو اپنے اختتام کو پہنچا جس میں چھ قسطیں نشر کی گئیں۔

فلی بیگ کو بہترین کامیڈی سیریز کا ایوارڈ دیا گیا۔

بلی پورٹر بہترین اداکار جبکہ جوڈی کومر نے بہترین اداکارہ کا ٹائٹل اپنے نام کیا۔