لاہورہائیکورٹ کی جانب سے ڈراما سیریل ’’عہد وفا‘‘ پر پابندی کی درخواست کومسترد کردیا گیا۔

تفصیلات کے مطابق لاہور ہائیکورٹ میں ڈراما سیریل ’’عہد وفا‘‘ پر پابندی کے لیے دائر درخواست پر سماعت ہوئی۔ دوران سماعت عدالت نے ڈرامے پر پابندی کے لئے دائر درخواست ناقابل سماعت قرار دے کر مسترد کردی۔

جسٹس شاہد وحید نے ریمارکس دیتے ہوئے کہا کہ درخواست گزار پہلے پیمرا سے رجوع کرے، شنوائی نہ ہونے پر عدالت سے رجوع کرسکتا ہے۔

واضح رہے کہ لاہور ہائی کورٹ میں ڈراما سیریل ’’عہد وفا‘‘ پر پابندی عائد کرنے کے لیے درخواست دائر کی گئی تھی جس میں موقف اختیار کیا گیا تھا کہ ڈرامے میں ملک کے سیاستدانوں اور میڈیا کی کردارکشی کی جا رہی ہے، اس سے بیرونی دنیا میں پاکستان کا مجموعی طور پر منفی تاثر پیدا ہورہا ہے۔

درخواست میں کہاگیا کہ عدالت ’’عہد وفا‘‘  نشر کئے جانے پر پابندی عائد کرے۔

ڈراما سیریل ’’عہدِ وفا‘‘  4 دوستوں کی کہانی ہے، جس میں احد رضا میر، احمد علی اکبر، اسامہ خالد بٹ اور وہاج علی مرکزی کردار ادا کر رہے ہیں۔ ان کے ہمراہ  زارا نور عباس، علیزے شاہ، حاجرہ یامین اور ونیزہ احمد بھی اہم کردار ادا کر رہی ہیں جبکہ ڈراما آئی ایس پی آر کے تعاون اور سیفی حسن کی ہدایت کاری میں بنایاگیاہے۔