خوبرو اداکارہ کبرٰی خان نے آنے والے پروجیکٹ صنفِ آہن سے متعلق بتایا ہے کہ  وہ اس سیریز میں ایک کیڈٹ کا کردار ادا کر رہی ہیں، کبریٰ خان اور دیگر اداکار ایک اصلی کیڈٹ کے طور پر فرائض سر انجام دیں گے۔

کبرٰی خان نے حال ہی میں اپنے ایک انٹرویو میں بتایا ہے کہ اس سیریز میں اداکاری کرنے کے لئے اداکاروں کو خصوصی ٹریننگ کرنی پڑی ہے۔

اداکارہ نے بتایا کہ  وہ اس آنے والے پروجیکٹ کے لئے بہت پرجوش ہیں، انہوں نے اصل میں اپنے کردار سے تھوڑا بہت پیار کرنا شروع کر دیا ہے۔

انہوں نے کہا کہ ہم صنفِ آہن کی شوٹنگ کے ساتھ ٹریننگ بھی کر رہے ہیں، اس پروجیکٹ کے لئے ہمیں بطور کیڈٹس مناسب تربیت دی جائے گی، ہمیں گن چلانا، سلوٹ کرنا، یہ سب سیکھنا ہے۔

اداکارہ نے مزید انکشاف کیا کہ وہ، سجل علی، سائرہ یوسف اور یمنیٰ زیدی سمیت دیگر اداکار اس تربیت کے دوران ایک اصلی کیڈٹ کے طور پر فرائض سرانجام دیں گی۔

انہوں نے بتایا کہ ہم مختصر مدت کے لئے اصل میں کیڈٹس بننے جا رہے ہیں، یہی وہ چیز ہے جس کی وجہ سے وہ خوش ہیں اور اپنے پیشے سے اتنا پیار کرتی ہیں کیونکہ انہیں اندازہ ہے کہ وہ اداکاری کے علاوہ کسی دوسرے پیشے میں اس طرح فوج میں جانے کا موقع نہیں حاصل کرسکیں گی اور جو کچھ وہ اس پروجیکٹ میں سیکھ رہی ہیں وہ نہیں سیکھ سکیں گی، وہ اس پروجیکٹ کے بارے میں بہت پرجوش ہیں۔

خیال رہے کہ صنفِ آہن پاک فوج کے شعبۂ تعلقاتِ عامہ اور سِکس سِگما پلس کے اشتراک سے خواتین کے حقوق کے موضوع پر بنایا جا رہا ہے۔