بالی ووڈ کی معروف اداکارہ جوہی چاولہ کی جانب سے بھارت میں فائیو جی ٹیکنالوجی کے متعارف کرائے جانے کے خلاف کیس داخل کرنے پر اس سال کے اوائل میں کافی باتیں ہوئیں ہیں۔

تاہم دہلی ہائیکورٹ نے ان کی اس درخواست کے ساتھ ان کی دیگر دو درخواستوں کو خارج کرتے ہوئے ان پر 20 لاکھ روپے کا جرمانہ عائد کیا تھا۔

جوہی کے اس اقدام پر انٹر نیٹ یوزرز نے ان پر الزام عائد کیا کہ انھوں نے اس کے ذریعے سے شہرت حاصل کرنے کی کوشش کی۔

ہفتوں تک خاموش رہنے کے بعد جوہی چاولہ نے پیر کو اس حوالے سے کہا کہ وہ گزشتہ ایک عرصے سے لوگوں میں الیکٹرو میگنیٹک فیلڈ ریڈی ایشن کے حوالے سے شعور بیدار کرنے کی مہم چلا رہی ہیں۔

ان کے جاری کردہ ایک بیان کے مطابق جون میں جو کچھ ہوا اس سے مجھے کافی مایوسی ہوئی ہے کہ ایک طرف تو مجھ پر پبلسٹی حاصل کرنے کا الزام لگایا گیا تو دوسری جانب کافی گمنام لوگوں کی جانب سے دل کو گرما دینے والے پیغامات بھی موصول ہوئے جن کا کہنا تھا کہ وہ مکمل طور پر انھیں سپورٹ کرتے ہیں، جن میں سے ایک مہاراشٹر کے کسانوں کے ایک گروپ نے بھیجا جس پر میری آنکھوں سے آنسوں نکل آئے۔

اداکارہ نے بتایا کہ ان کسانوں کی خواہش تھی کہ وہ رضاکارانہ مہم چلا کر اپنی کسان کمیونٹی کے دس ہزار لوگوں سے رقم چندہ کر کے مجھے بھجوائیں گے تاکہ مجھ پر عائد کیے گئے بھاری جرمانے کی رقم کی ادائیگی میں مدد کی جاسکے۔