پاکستانی تاریخ  کے سب سے بدنام سیریل کِلر پر بننے والی فلم جاوید اقبال، دی اَن ٹولڈ اسٹوری آف اے سیریل کلر کے سیٹ سے اداکارہ عائشہ عمر نے اپنی ایک ویڈیو شیئر کی ہے۔

عائشہ عمر نے اپنے انسٹا گرام اکاؤنٹ پر ایک مختصر سی ویڈیو شیئر کی ہے جس میں اُنہیں پوسٹر کے لئے فوٹو شوٹ کرواتے ہوئے دیکھا جا سکتا ہے۔

عائشہ عمر کی ویڈیو دیکھ کر اندازہ لگایا جا سکتا ہے کہ وہ اس کردار میں ڈھلنے کے لئے کس قدر محنت کر رہی ہیں۔

اس فلم میں معروف اداکار یاسر حسین مرکزی جبکہ عائشہ عمر اہم کردار میں نظر آئیں گی، فلم کا پوسٹر پہلے ہی دونوں  فنکاروں کی جانب سے شیئر کیا جا چکا ہے ۔

واضح رہے کہ فلم جاوید اقبال لاہور سے تعلق رکھنے والے ایک ایسے حقیقی کردار پر بنائی گئی ہے کہ جس نے 1999ء میں پولیس کے سامنے خود 100 بچوں کے قتل کا اعتراف کر کے پورے ملک کو ہلا کر رکھ دیا تھا۔