پاکستان کے معروف اداکار و میزبان دانش تیمور نے انکشاف کیا ہے کہ انہوں نے اہلیہ و اداکارہ عائزہ خان کو سوشل میڈیا سائٹ پر پسند کیا تھا۔

دانش تیمور کی ایک پرانے ٹاک شو کی ویڈیو سوشل میڈیا پر وائرل ہوگئی ہے جس میں انٹرویو کے دوران دانش تیمور نے اپنے مداحوں کو بتایا کہ اُنہیں عائزہ خان کہاں ملیں اور کیسے  پسند آئی تھیں۔

اس ویڈیو میں دیکھا جا سکتا ہے کہ اس شو کے میزبان معروف کامیڈین (مرحوم) عمر شریف ہیں جو کہ دانش تیمور سے پوچھ رہے ہیں کہ انہیں عائزہ خان کہاں پسند آئی تھیں؟

جواب میں دانش تیمور نے کہا کہ یہ بہت پرانی بات ہے جب عائزہ اور اُن کی جان پہچان ایک سوشل میڈیا پلیٹ فارم آرکٹ پر ہوئی تھی۔

انہوں نے بتایا کہ ہماری بات کا آغاز وہیں سے ہوا تھا اور اُس وقت عائزہ خان میڈیا میں نہیں آئی تھیں، بس اُن کی ایک مداح تھیں۔

دانش تیمور نے کہا کہ اُنہوں نے ہی اس سوچ کا آغاز کیا تھا کہ اگر وہ شادی کریں گے تو صرف عائزہ خان سے کریں گے۔

واضح رہے کہ دانش تیمور اور عائزہ خان کی جوڑی پاکستان شوبز انڈسٹری کی خوبصورت اور کامیاب ترین جوڑیوں میں سے ایک ہے، عائزہ خان اور دانش تیمور کو سوشل میڈیا سائٹس پر مداحوں کی جانب سے بطور فنکار اور جوڑی خوب سراہا بھی جاتا ہے۔