پاکستان کی نامور اداکارہ صبا قمر اور  معروف گلوکار بلال سعید پر فرد جرم عائد کے لیے 14 اکتوبر کی تاریخ مقرر کر دی گئی ہے۔

تفصیلات کے مطابق لاہور کی ضلع کچہری میں مسجد وزیر خان میں گانے کی عکسبندی اور رقص کرنے کے مقدمے پر سماعت ہوئی ہے۔

اداکارہ  صباء قمر اور گلوکار بلال سعید جوڈیشل مجسٹریٹ کی عدالت میں پیش ہوئے ہیں جبکہ جوڈشنل مجسٹریٹ نے سماعت کی۔

دوران سماعت تفتیشی رپورٹ کے مطابق اداکارہ صبا قمر اور بلال سعید پر مسجد وزیر خان میں ڈانس کرنے کا الزام عائد ہے۔

پراسیکیوٹر نے تفتیشی رپورٹ میں کہا ہے اداکارہ صبا قمر نے مسجد وزیر خان میں فلم کا سین عکس بند کرایا تھا، انہوں نے نکاح کے سیشن میں مسجد میں رقص کیا تھا اور دونوں ملزمان نے فلم کی شوٹنگ کے دوران مسجد کا تقدس پامال کیا تھا۔

 عدالت نے آئندہ سماعت پر ملزمان کو چالان کی نقول فراہم کرنے کا حکم دیتے ہوئے کیس کی سماعت 14 اکتوبر تک ملتوی کردی۔