پاکستانی گلوکار علی ظفر کی جانب سے علی گل پیر کے خلاف کارروائی کی درخواست دائر کردی گئی ہے۔

تفصیلات کے مطابق ضلع کچہری میں علی ظفر کے خلاف سوشل میڈیا مہم کے کیس کی سماعت میں پیشی کے لئے علی گل پیر نے میڈیکل سرٹیفیکیٹ جمع کرایا ہے۔

جس پر علی ظفر نے درخواست دائر کرتے ہوئے مؤقف اختیار کیا ہے کہ علی گل پیر نے عدالت کو گمراہ کرنے کے لیے جھوٹا میڈیکل سرٹیفیکیٹ پیش کیا ہے۔

درخواست میں مزید کہا گیا علی گل پیر کے مطابق فریکچر کے باعث وہ عدالت میں پیش نہیں ہوسکتے، جب کہ ریکارڈ کے مطابق ملزم بالکل ٹھیک ہے لیکن غلط بیانی کرکے عدالت پیش نہیں ہوئے لہذا عدالت علی گل پیر کے خلاف غلط بیانی کرنے پر فوجداری کی کارروائی کرے۔

علی ظفر نے عدالت سے استدعا کرتے ہوئے کہا میشا شفیع نے تو عدالت آنا نہیں ہے اس لیے کیس کا فیصلہ کرکے میری زندگی آسان کردیں۔

خیال رہے کہ علی ظفر کی مدعیت میں میشا شفیع اور دیگر کے خلاف ایف آئی اے نے مقدمہ درج کر رکھا ہے۔

اس کیس میں وفاقی تحقیقاتی ادارے کی جانب سے چالان میں گلوکارہ میشا شفیع اور اداکارہ عفت عمر سمیت 8 ملزمان نامزد کیے گئے ہیں۔

چالان کے مطابق میشا شفیع ، لینا غنی ، عفت عمر، فریحہ ایوب ، فیضان رضا ،حسیم زمان ،علی گل پیراور ماہم جاوید نے علی ظفر کے خلاف سوشل میڈیا پر مربوط مہم چلائی لیکن ملزمان اپنی صفائی میں ٹھوس شواہد پیش نہیں کر سکے۔