پاکستانی اداکارہ یشما گِل نے بھارتی اداکارہ ثناء خان سے ملاقات کی تصاویر مداحوں کے ساتھ شیئر کردی ہیں۔

یشما گِل نے ثناء خان اور اور اُن کے شوہر مفتی انس کے ہمراہ تصاویر شیئر کرتے ہوئے اپنے جذبات کا اظہار کیا ہے۔

اداکارہ نے لکھا کہ سب سے پہلے اللّٰہ سبحانہ وتعالیٰ کا شکریہ جس نے مجھے اپنے گھر اور نبی کریم صلی اللّٰہ علیہ وسلم کے شہر کی زیارت کرنے کا موقع دیا اور پھر اُس نے مجھے ان خوبصورت لوگوں سے ملوایا جن سے میں ملنا چاہتی تھی۔

یشما گِل کا ثناء خان کی جانب سے کی جانے والی میزبانی کا شکریہ ادا کرتے ہوئے کہنا تھا کہ اللّٰہ تعالیٰ ہم میں سے ہر ایک کے ایمان کو اِن کی طرح مضبوط بنائے، مہمان نوازی اور حوصلہ افزائی کے لیے آپ کا شکریہ۔

انہوں نے اپنی پوسٹ میں لکھا کہ اللّٰہ تعالیٰ کے لیے نئی دوستیوں کی یہ ابتداء ہے، انشاءاللّٰہ۔

واضح رہے کہ یشما گِل اور بھارتی اداکارہ ثناء خان آج کل سعودی عرب میں مذہبی رسم عمرہ کی ادائیگی کے لیے موجود ہیں۔

یہ دونوں اداکارائیں رمضان المبارک کے آخری عشرے میں خانہ کعبہ اور مسجدِ نبوی کے روح پروَر مناظر سے لطف اندوز ہو رہی ہیں اور ساتھ میں اپنے مداحوں کے ساتھ بھی سوشل میڈیا پر نت نئی تصاویر شیئر کر رہی ہیں۔